Of­beldis­fulli pabbinn fær að mæta á mót en synirnir verða ekki þar

Á sama tíma og margt fremsta frjálsíþróttafólk Íslands keppir á Meistaramóti Íslands innanhúss í Laugardalshöll um helgina þá munu Norðmenn keppa á sínu meistaramóti.

Mótið í Noregi er hins vegar opið og því geta erlendir keppendur tekið þátt, þar á meðal keppendur sem Gjert Ingebrigtsen þjálfar.

Þó að hann hafi verið bannaður frá stórmótum, af norska frjálsíþróttasambandinu, þá getur hann mætt á mótið um helgina því þar eru það frjálsíþróttafélögin í landinu sem að ráða. Samkvæmt TV 2 hafa þau veitt Ingebrigtsen heimild til að mæta.

Enginn af sonum Ingebrigtsen keppir á mótinu. Hann var síðasta sumar sýknaður af ákæru um að hafa beitt einn þeirra, Ólympíumeistarann Jakob, ofbeldi en hlaut hins vegar 15 daga skilorðsbundinn dóm fyrir ofbeldi gegn Ingrid, dóttur sinni.

Norskir miðlar segja þjálfarann hafa fengið franska hlauparann Maël Gouyette inn í sinn lærlingahóp og að hann keppi í 1.500 og 3.000 metra hlaupi í Noregi um helgina. Narve Gilje Nordås, Per Svela, José Carlos Pinto og Kieran Lumb séu einnig í hópi Ingebrigtsen og muni keppa á mótinu, ýmist í 800, 1.500 eða 3.000 metra hlaupi.