Fékk skauta í augað á Ólympíu­leikunum

Atvikið átti sér stað þegar síðasti riðill kvenna í átta manna úrslitum í 1500 metra skautahlaupi var rúmlega hálfnaður. Þrír af sex keppendum féllu í beygju og var riðillinn stöðvaður.

Ítalska heimavonkona Arianna Fontana, sem er ríkjandi ólympíumeistari, var á meðal þeirra sem féllu. Hún þurfti að fá aðhlynningu en verr fór fyrir Sellier.

Þegar endursýning af fallinu var sýnd á stórum skjá varð þögn í höllinni. Myndirnar sýndu nefnilega að skauti bandarísku Kristen Santos-Griswold hafði hitt Sellier nálægt auganu eftir að hlífðargleraugun hennar duttu af.

Henni blæddi mikið og var settur upp skjöldur á meðan hún fékk aðhlynningu. Hún var síðan borin út.

„Auga Kamilu Sellier er svo bólgið að ekki er hægt að opna það. Búið er að sauma skurðinn á kinninni og kinnbeinið er skaddað. Hún fer á sjúkrahús,“ sagði Konrad Niedzwidzki í pólsku ólympíunefndinni við TVP Sport, samkvæmt sænska Aftonbladet.

Samkvæmt kanadíska CBC mun auga Sellier líklega ná sér að fullu.

Það þurfti að þurrka blóð af ísnum áður en hægt var að hefja riðilinn aftur. Það var gert án Sellier og Santos-Griswold. Báðum var vísað úr keppni fyrir að hafa átt sök á fallinu.