„Ekki endi­lega eitt­hvað sem ég þarf að upp­lifa aftur“

Tæpar þrjár vikur eru síðan að Ísland lauk leik á EM þar sem liðið lenti í fjórða sæti, sem er besti árangur liðsins á stórmóti í 16 ár. Þá lauk rúmlega mánaðar törn og örmagna Snorri Steinn sem sneri heim til Íslands.

„Ég var nú nánast veikur sko. Ég var bara tómur. Maður átti ekkert eftir og ég held það sé bara eðlilegasti hlutur í heimi. Á mótinu sjálfu þegar á öllu gengur ertu ekkert að velta því fyrir þér. Þú kemst ekki upp með það. Þetta er bara stórmót og þú ferð í gegnum það. Svo er eðlilegast í heimi þegar þú kemur heim, að þú krassir aðeins,“ segir Snorri Steinn.

Vill ekki upplifa það aftur

Einn dagur var tilfinningaríkari en aðrir. Þegar Ísland gerði 38-38 jafntefli við Sviss og von um undanúrslit virtist úti áður en jafntefli Ungverja við Svía greiddi leiðina á ný um sex klukkustundum síðar.

„Þessi rússibani eftir Sviss-leikinn þegar manni fannst þetta vera farið og þetta kom aftur. Það eru öfgar í báðar áttir,“

„Það er yfirleitt gott og slæmt að spila fyrsta leik. Þegar þú tapar er það mjög vont. Ég er ekki viss um að þessi staða hafi oft komið upp að ég þurfi að halda tvo fundi eftir sama leikinn. Þeir eru algjörlega á sitthvorum endanum á stemningu og tilfinningum. Auðvitað var endirinn góður á þeim degi. En þetta er ekkert endilega eitthvað sem ég þarf að upplifa aftur,“ segir Snorri Steinn.

Situr enn í honum

Ísland tapaði báðum leikjum sínum þegar komið var í úrslitahelgina í Herning. Fyrir Dönum í undanúrslitum og Króötum um bronsið. Snorri segir vonbrigði að hafa farið verðlaunalaus af mótinu.

„Það náttúrulega situr í mér að hafa ekki náð að vinna Dani og komast í úrslit. Svo situr það í mér að hafa ekki náð að klára medalíu. Ég þekki það sjálfur að ná medalíu að það er munur því og að lenda í fjórða sæti. Það á alltaf eftir að trufla mann ef hún kemur ekki einhvern tímann seinna.“

Bullandi trú á liðinu

Hefurðu trú á því að þetta lið geti unnið til verðlauna á næstu mótum?

„Nú þarf maður að fara varlega, varðandi væntingastjórnun og allt þetta. Ég er búinn að upplifa hvað þetta er erfitt og það krefst helvíti mikils að ná svona langt. En ef þú kemst einu sinni í undanúrslit þá geturðu alveg gert það aftur,“

„Ég hef bullandi trú á þessu liði. Mér finnst þetta frábærir strákar og það ótrúlega gaman að fá að þjálfa þá. Það er krefjandi og þeir gera mann betri. Þannig að já, ég trú á því,“ segir Snorri Steinn.

Viðtalið má sjá í spilaranum.