Fær um þrjá­tíu milljónir í sára­bætur frá ríkasta manni Úkraínu

Heraskevych var bannað að keppa á Vetrarólympíuleikunum því hann vildi heiðra minningu íþróttafólks sem hefur fallið frá í stríðinu við Rússland með myndum af þeim á hjálmi sínum.

Hann máti nota hjálminn á æfingum í Mílanó og Cortina en ekki í keppni því þar er allur pólitískur áróður bannaður. Alþjóða Ólympíunefndin dæmdi hann úr leik og alþjóða íþróttadómstólinn vísaði áfrýjun hans frá.

Nú hefur ríkasti maður Úkraínu, Rinat Akhmetov, fjárfestir og eigandi fótboltafélagsins Shaktar Donetsk, tilkynnt að hann muni greiða sleðakappanum Heraskevych tíu milljónir úkraínskra hrinja, sem jafngildir um þrjátíu milljónum íslenska króna og er jafn mikið og hann hefði fengið fyrir gullverðlaun á ÓL:

„Vlad Heraskevych var neitað um tækifæri til að keppa á Ólympíuleikunum en snýr samt aftur til Úkraínu sem sannur sigurvegari. Stoltið og virðingin sem hann hefur öðlast meðal úkraínsku þjóðarinnar eru þó stærstu verðlaunin...

...Á sama tíma vil ég að hann hafi næga orku og fjármagn til að halda sínum ferli áfram, ásamt því að halda áfram baráttunni fyrir sannleikanum, frelsinu og minningu þeirra sem hafa gefið Úkraínu líf sitt“ sagði Akhmetov í tilkynningu sem Shaktar Donetsk gaf út.