Mætir með medalíu af ÓL í jarðar­för föður síns

Johann Andre vann til bronsverðlauna í skíðastökki, ásamt liðsfélaga sínum Kristoffer Eriksen Sundal, á Vetrarólympíuleikunum í dag. 

Faðir Johann Andre lést nokkrum dögum fyrir Vetrarólympíuleikana, 68 ára að aldri, eftir snarpa baráttu við krabbamein. Hinsta ósk föðursins var að Johann myndi keppa á Vetrarólympíuleikunum og ákvað fjölskyldan í sameiningu að faðir hans yrði jarðsettur eftir að Johann hefði lokið keppni á leikunum.

Nú er orðið ljóst að Johann snýr aftur heim til Noregs með bronsverðlaun um hálsinn og hann var skiljanlega meyr eftir að hafa unnið til verðlauna í dag, hugsaði sterkt til föður síns.

„Það er erfitt að koma því í orð hvaða tilfinningar eru að bærast um innra með mér núna,“ sagði Johann Andre í samtali við NRK. „Þetta er stór stund fyrir mig.“

„Í fullri hreinskilni trúði ég því ekki að ég myndi vera að berjast um medalíu á þessum leikum en ég lofaði föður mínum samt sem áður að það yrði raunin. Ég myndi gera allt mitt til þess að reyna vinna medalíu. Ég sá það á honum að honum leið vel með það.“