Ellefu mörk Viggós dugðu skammt

Fastlega var búist við heimasigri Lemgo í dag en liðið berst um Meistaradeildarsæti við topp deildarinnar. Erlangen hins vegar í neðri hlutanum, sjö stigum frá fallsætunum.

Lemgo fór töluvert betur af stað og komst 11-6 yfir þegar fyrri hálfleikur var rúmlega hálfnaður. Viggó hafði á þeim tímapunkti skorað fjögur af sex mörkum Erlangen en Andri ekki komist á blað.

Þá small vörn Erlangen og Andri komst í gang í sókninni. Erlangen skoraði fimm mörk gegn tveimur á síðustu tólf mínútum hálfleiksins – Andri Már með þrjú þeirra og Viggó tvö. Staðan í hálfleik var því 13-11 fyrir Lemgo og íslenski dúettinn með níu af ellefu mörkum gestanna.

Lemgo byrjaði síðari hálfleikinn betur og byggði hægt og rólega upp forskot sitt á ný. Erlangen var aldrei líklegt til að jafna leikinn og honum lauk með sex marka sigri Lemgo, 27-21.

Viggó Kristjánsson var langmarkahæstur á vellinum með ellefu mörk, þar af sjö af vítalínunni. Andri Már Rúnarsson skoraði fjögur.

Lemgo er eftir sigurinn með 30 stig í fimmta sæti deildarinnar, jafnt Kiel sem er sæti ofar, og aðeins tveimur stigum frá Fusche Berlín öðru sætinu.

Erlangen er með 14 stig í tólfta sæti.