Stal kredit­korti liðsfélaga og fagnaði gulli fyrir framan hana

Simon missti marks á skífunum aðeins einu sinni og kláraði brautina á 41 mínútu og 15 sekúndum, en óvíst var um tíma hvort hún myndi keppa á Vetrarólympíuleikunum.

Árið 2023 var Simon kærð af liðsfélaga sínum í franska landsliðinu, Justine Braisaz- Bouchet sem endaði í 80. sæti í dag, fyrir að stela kreditkorti hennar og versla með því á netinu fyrir tæplega 2.000 evrur.

Simon var á síðasta ári dæmd í þriggja mánaða skilorðsbundið fangelsi og greiddi 15.000 evra sekt fyrir greiðslukortasvik og þjófnað.

Hún var dæmd í sex mánaða bann af aganefnd franska skíðasambandsins í nóvember síðastliðnum, en fékk fimm mánuði skilorðsbundna og náði þannig að taka þátt á ÓL.

Braisaz-Bouchet lenti hins vegar í miklu netníði eftir að hafa kært liðsfélaga sinn.

„Ég sagði mína sögu árið 2023, eftir þetta ótrúlega tímabil hjá Juliu Simon, og margir sáu þetta bara þannig að ég væri að búa til vandamál“ sagði Braisaz-Bouchet. 

„Hún veit hver hún er“

Þegar Simon fór yfir marklínuna setti hann fingur við munn og sussaði, en vildi ekki segja hvers vegna.

„Þetta var fyrir eina manneskju, hún veit hver hún er því við höfum talað saman. Ég ætla ekki að tjá mig meira um þetta“ sagði Simon og vildi heldur ekki tjá sig um dóminn eða bannið sem hún hlaut.

„Ég einbeiti mér bara að minni íþrótt, það er það sem ég elska mest. Ég var með markmið og setti alla mína orku í það. Þetta var erfiður mánuður en í dag fékk ég fullkomin úrslit, mér líður bara eins og í draumi“ sagði Simon. 

Þessi skandall var sá stærsti af nokkrum frönskum skíðaskotfimiskandölum á síðustu árum. 

Á síðasta ári varð Lou Jeanmonnot, sem vann silfurverðlaun í dag, fyrir morðhótunum eftir að hafa tapað nokkrum keppnum. Annar franskur keppandi, Jeanne Richards, var vikið tímabundið úr landsliðinu fyrir að eiga við riffil liðsfélaga síns.

Skíðaskotfimin má ekki við mikið fleiri hneykslismálum og hefur vandlega unnið að því undanfarin ár að endurheimta orðspor sitt, síðan Anders Besseberg fyrrum formaður alþjóða skíðaskotfimisambandsins sagði af sér árið 2018 fyrir að þiggja mútur frá Rússum í miðri lyfjanotkunarrannsókn, eftir því sem kemur fram í umfjöllun The Guardian.