Ólympíuverðlaunin í ár eru verð­mætari en nokkru sinni fyrr

Vetrarólympíuleikarnir 2026 verða settir í Mílano og Cortina á Ítalíu í kvöld með veglegri setningarhátíð sem fer fram á tveimur stöðum, þar á meðal á hinum heimsfræga leikvangi San Siro.

Meira en sjö hundruð gull-, silfur- og bronsverðlaun verða afhent fremsta vetraríþróttafólki heims sem tekur þátt í greinum á borð við skíði, íshokkí, listskauta og krullu.

Tilfinningalega gildið ómælanlegt

Þótt tilfinningalegt gildi þeirra sé ómælanlegt þá verða þessir verðlaunapeningar, metnir í peningum, verðmætari en nokkru sinni fyrr. Frá Ólympíuleikunum í París í júlí 2024 hefur skyndiverð á gulli og silfri hækkað um 107% og 200%, samkvæmt gögnum frá FactSet.

Þessar gríðarlegu hækkanir þýða að, miðað við eingöngu málmverð, eru gullverðlaun nú metin á um 2.300 dali, 283 þúsund íslenskar krónur, eða meira en tvöfalt verðmæti þeirra á Ólympíuleikunum í París. Silfurverðlaun fyrir annað sætið eru metin á tæplega 1.400 dali, 172 þúsund íslenskar krónur, eða þrefalt verðmæti þeirra fyrir tveimur árum.

Eftirspurn frá almennum fjárfestum hefur að hluta til ýtt undir hækkun silfurs. Gullverð hækkaði eftir að stórir seðlabankar juku við forða sinn og fjárfestar flykktust í að kaupa þessa hefðbundnu öruggu eign innan um pólitískan óróa á heimsvísu.

Ekki allt gull sem glóir

Sigurvegarar fá verðlaunapeninga sem eru smíðaðir úr endurunnum málmi af ítölsku myntsláttunni og prentsmiðjunni (Istituto Poligrafico e Zecca dello Stato). En það er ekki allt gull sem glóir.

Í gullverðlaunum eru aðeins sex grömm af heildarþyngdinni, 506 grömm (16 trójuúnsur), hreint gull. Restin er úr silfri. Bronsverðlaun eru úr kopar og eru, með 420 gramma þyngd (15 únsur), aðeins metin á um 5,60 dali stykkið, samkvæmt gögnum sem skipuleggjendur viðburðarins hafa birt.

Ólympíugullverðlaun hafa ekki verið gerð úr hreinu gulli síðan á Ólympíuleikunum í Stokkhólmi í Svíþjóð árið 1912, að sögn uppboðshússins Baldwin's í London. Verðmæti þeirra verðlauna, sem vógu aðeins 26 grömm (0,8 trójuúnsur), hefði verið innan við 20 dalir miðað við gullverð á þeim tíma. Leiðrétt fyrir bandarískri neysluverðsvísitölu er sú tala nær 530 dölum á núvirði.

Selst fyrir mun meira en peningalegt verðmæti

Hins vegar, sem safngripir, geta ólympíuverðlaun selst fyrir mun meira en peningalegt verðmæti þeirra, sagði Dominic Chorney, yfirmaður fornmynta hjá Baldwin's, í viðtali við CNN.

Flest ólympíuverðlaun munu þó aldrei fara á sölu. „Tiltölulega fáir ólympíufarar selja verðlaunin sín, því þeim þykir svo vænt um þau,“ sagði Chorney.

Þrátt fyrir miklar sveiflur undanfarna daga gæti verð á gulli og silfri hækkað fjárhagslegt verðmæti ólympíuverðlauna enn frekar. Líklegt er að eftirspurn eftir góðmálmunum haldist sterk í ljósi viðvarandi geopólitískrar óvissu og vaxandi ríkisskulda, sagði Ole Hansen, yfirmaður hrávörustefnu hjá Saxo Bank.

„Ég myndi ímynda mér að gull- og silfurverðlaunin fyrir næstu Sumarólympíuleika (árið 2028) verði enn dýrari en þau eru núna fyrir Vetrarólympíuleikana,“ sagði Chorney.