Fjórar með nóró daginn fyrir fyrsta leik á ÓL

Maarit Valtonon, læknir finnska Ólympíuhópsins, sagði við finnska miðla að búið væri að setja hina veiku keppendur í einangrun á hótelherbergjum þeirra í Ólympíuþorpinu. Þá hafa öll svæði sem þeir voru á verið sótthreinsuð til að freista þess að hefta frekari útbreiðslu smita.

Finnska liðið aflýsti æfingu í dag, sem og fjölmiðlahittingi, vegna málsins, en það verður að koma í ljós í leiknum við Kanada á morgun hve vel mannað lið Finnlands verður.

Svíar dvelja á sama stað og Finnarnir og hafa gert ráðstafanir til þess að forðast smit.

„Við komumst að því að Finnar væru að glíma við magaflensu. Við vitum líka að Frakkar hafa glímt við eitthvað svipað og að grunur er um það sama hjá Bandaríkjunum,“ sagði Fredrik Joulamo, liðsstjóri sænska Ólympíuhópsins, við Expressen í Svíþjóð.

„Ég held að það sé ekki búið að greina það hver ástæðan gæti verið fyrir þessu. Þetta gæti verið tengt mat eða að menn hafi tekið eitthvað með sér,“ sagði Joulamo.

„Við reynum núna að komast að því hvar þeir [Finnar] hafa farið um, hvaða lyftur þeir notuðu og hvað við gerum varðandi þvottaherbergið og aðra aðstöðu sem hóparnir deila. Við erum í góðum samskiptum vaðrandi þetta. Svo reynum við bara að forðast alla snertingu við keppendur frá hinum löndunum núna. Notum spritt en þvoum hendurnar líka vel og vandlega. Það er það eina sem hægt er að gera,“ sagði Joulamo.