Ís­lensk landsliðskona til nítjánfaldra Noregsmeistara

Dana Björg mun ganga til liðs við Larvik í sumar en félagið hefur nítján sinnum orðið Noregsmeistari eða tíu sinnum oftar en næsta félag.

Larvik hefur þó ekki unnið titilinn síðan árið 2017. Liðið er eins og er í þriðja sæti norsku deildarinnar en bara þremur stigum frá toppnum.

Dana Björg spilar með Volda í norsku B-deildinni og er fyrirliði liðsins. Liðið hefur verið nálægt því að komast upp í úrvalsdeildina á síðustu árum en það hefur ekki tekist.

Dana lýsir sjálfri sér í viðtali á heimasíðu Larvik.

„Ég held að styrkur minn liggi í hraðaupphlaupunum. Ég er hröð, tæknilega góð, hef gaman af því að „trixa“ svolítið og legg gjarnan mitt af mörkum með orku og tali úti á vellinum,“ sagði Dana sem hefur spilað með íslenska landsliðinu undanfarin ár og var með á heimsmeistaramótinu í desember.

Félagaskiptin til Larvik skipta hana miklu máli, en hún hefur skýra sýn á stöðu félagsins í norskum handbolta.

„Larvik er félag með gríðarlega sögu og vigt. Þegar ég var yngri var handboltaskóli Larvik á sumrin það stærsta sem maður gat tekið þátt í. Að fá að semja við félag með slíka stöðu í handboltaheiminum í Noregi er mjög stórt og mjög gaman,“ sagði Dana.

Meðfram handboltanum er Danan að ljúka kennaranámi. Á komandi ári skrifar hún meistararitgerðina.

Hjá Volda spilar hún í treyju númer 23, númer sem hún hefur haft síðan hún var hjá Konnerud og notar einnig með landsliðinu. Hún var valin í íslenska landsliðið haustið 2024, 22 ára gömul, og lék sinn fyrsta leik á EM sama ár. Á HM 2025 var hún með í að skrá nafn sitt í íslenska handboltasögu.

„HM gekk betur af þessum tveimur. Við komumst áfram í milliriðil og náðum í stig þar í fyrsta skipti, og persónulega fékk ég líka meiri ábyrgð og spilatíma. Það var mjög lærdómsríkt,“ sagði Dana.

Dana er með tvöfalt ríkisfang, norskt og íslenskt, og sér íslenska landsliðið sem spennandi verkefni til framtíðar.

„Við erum margir ungir og nýir leikmenn núna, þannig að við erum að byggja upp lið svolítið frá grunni. Til lengri tíma litið vona ég að það verði enn betra,“ sagði Dana.