Valieva sneri aftur á ísinn eftir fjögurra ára bann

Valieva keppti á móti í Moskvu, lenti í 4. sæti í einstaklingskeppni og komst áfram í næstu umferð. Áhorfendur fögnuðu henni vel þegar hún mætti til leiks og köstuðu tuskudýrum inn á ísinn.

Valieva, þá aðeins fimmtán ára, var mikið í fréttum á síðustu Vetrarólympíuleikum. Hún hjálpaði Rússum að vinna gullverðlaun í liðakeppni í listdansi á skautum en var síðan dæmd úr leik eftir að hjartalyfið trimetazidine greindist í sýni sem var tekið úr henni á rússneska meistaramótinu sex vikum fyrir Vetrarólympíuleikana í Peking.

Þrátt fyrir að hafa fallið á lyfjaprófi fékk Valieva leyfi til að keppa í einstaklingskeppninni þar sem hún náði sér ekki á strik og endaði í 4. sæti.

Valieva, sem er nú nítján ára, er nú mætt aftur til keppni eftir að hafa afplánað fjögurra ára bann sem Alþjóða íþróttadómstóllinn, CAS, úrskurðaði hana í. Hún verður þó ekki með á Vetrarólympíuleikunum í Mílanó og Cortina sem hefjast á föstudaginn þar sem hún missti af úrtökumótunum fyrir leikana.

Valieva gæti snúið aftur á Vetrarólympíuleikana 2030 sem verða haldnir í frönsku ölpunum.