Sauð á Degi sem lét þá sem ráða heyra það

Króatar verma toppsæti milliriðils tvö með sex stig, stigi meira en Ísland og Svíþjóð og vita það fyrir víst að sigur í dag gegn Ungverjalandi tryggir þeim sæti í undanúrslitum mótsins. Það sama gildir um Ísland en íslenskur sigur gegn Slóvenum tryggir Strákunum okkar sæti í undanúrslitum.

Það er spilað þétt á EM þessa dagana. Króatar þurftu að leggja mikið á sig til þess að ná fram sigri gegn Slóvenum í gær og þurfa að mæta klárir strax aftur í dag í slag gegn Ungverjum upp á líf og dauða í mótinu. 

Öll hin lið riðilsins eru í sömu stöðu og Króatar hvað varðar þétta leikjadagskrá en Degi finnst fullmikið af því góða að láta þáttökuþjóðir á mótinu spila tvo daga í röð og hann lét óánægju sína í ljós eftir leik í gær.

„Það líða tuttugu og tvær klukkustundir á milli leikja hjá okkur. Ég þakka bara EHF fyrir,“ sagði Dagur með kaldhæðnislegum tón. „Þetta er ótrúlegt, það að við þurfum að spila tvo daga í röð, gjörsamlega ótrúlegt.“

Dagur er ekki fyrsti Íslendingurinn sem lætur í sér heyra sökum keppnisfyrirkomulagsins á EM. 

Gísli Þorgeir Kristjánsson, leikstjórnandi íslenska landsliðsins viðraði einnig óánægju sína með það í viðtali við TV 2 í Danmörku á dögunum. 

Ísland mætir Slóveníu í dag klukkan hálf þrjú í lokaumferð milliriðla EM. Sigur í þeim leik gulltryggir Íslandi sæti í undanúrslitum mótsins. Þetta varð ljóst efir jafntefli Svía gegn Ungverjalandi í gær. 

Svo gæti líka farið að jafntefli nægi en í því tilfelli mættu Svíar ekki vinna Sviss í kvöld.

Stóri punkturinn í þessu öllu saman er að örlögin eru í höndum  Strákanna okkar fyrir leik dagsins. Sigur þar og við erum á leið í undanúrslit.