Ekki skrýtið að eitt­hvað bresti vegna á­lags á framlínustarfsmenn

BHM stefnir nú að því að birta reglulegar greiningar á veikindaforföllum en Ingvari Frey Ingvarssyni, hagfræðingi hjá BHM, finnst umræðan um aukin forföll einkennast af einföldunum.

„Það er miklu meira sem býr að baki. Við erum að skoða gögn frá Noregi, Svíþjóð og Danmörku og þá sjáum við að það liggja þarna að baki kerfislægar ástæður. Við erum að tala um álag, manneklu og sífellt kröfuharðara vinnuumhverfi. Og þá kemur upp þessi streita, kvíði og fleira; það er að segja þessir álagstengdu sjúkdómar sem bitna ekki síst á fólki í framlínu opinberrar þjónustu. Við erum að tala um menntunina, heilbrigði, og velferð. Þarna erum að ræða fjölmargar kvennastéttir og háskólamenntaða sérfræðinga og það sést vel til að mynda í Svíþjóð að konur eru frekar útsettar fyrir streitu og álagstengdum veikindum.“

Skortur á greinargóðum gögnum frá Íslandi

Tölur frá virk sýna að konur séu útsettari fyrir streitu og álagstengdum veikindum en þær leiti sér líka frekar aðstoðar en karlmenn. Í greiningunni er kallað eftir því að aðgerðir til að bæta úr stöðunni taki mið af þessum upplýsingum. Þá er skortur á greinargóðum skráningum um veikindi og greiningu.

„Við getum lesið fjölmargar rannsóknir í nágrannalöndunum okkar þar sem verið er að greina hvernig veikindi þetta eru og ástæður þess, við höfum ekki þessi sömu gögn hér á Íslandi og það er rosalega mikilvægt að við skráum upplýsingarnar til að við getum horft heildstætt á málið. Það þarf sérstaklega að efla vinnuvernd og forvarnir og styrkja snemmtæka endurhæfingu til að hjálpa fólki að koma til baka.“

Vandinn kerfislægur líkt og í nágrannalöndum

Þau hafni því að vandinn sé einstaklingsbundinn.

„Á Íslandi hefur verið gríðarleg fólksfjölgun á stuttum tíma og það reynir á þessa innviði sem við höfum, heilbrigðiskerfið, menntakerfið og fleira. Þau eru að taka á þessum mikla fjölda sem er að koma til landsins þannig að það er ekkert skrýtið þó að það bresti eitthvað og því miður hafa aðilar verið að einfalda umræðuna í stað þess að horfa kerfislægt á þetta,“ segir Ingvar.