Há­mark tvær vikur í heilsutengd ára­móta­heit með eigin­konunni

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvað er það fyrsta sem þú gerir á morgnana?

„Ég stilli klukkuna á sjö en er yfirleitt vaknaður aðeins áður en hún hringir. Fyrsta verk dagsins er að teygja mig símann og kíkja á póstinn. Því næst geng ég úr skugga um að dóttir mín hafi vaknað við vekjaraklukkuna sína. Það þarf jafnan nokkrar áminningar þangað til hún drífur sig fram úr. 

Þá fer ég í sturtu og tek ákvörðun um hvort ég nenni að strauja skyrtu eða fara í peysu. 

Skyrtan hefur oftast vinninginn. 

Kippi með mér lyklum, tölvu og jakka, og renn út rétt fyrir átta til að skutla syninum í skólann áður en ég held til vinnu.

Á skalanum 0–10: hversu góður eða vonlaus ertu í að standa við áramótaheit?

„Ég er alveg vonlaus—svona 1,5 af 10—og hef í raun gefist upp á áramótaheitum. Eiginkonan er hins vegar alltaf mjög peppuð fyrir heilsutengdum áramótaheitum og ég tek yfirleitt þátt með henni, fullmeðvitaður um að þetta er tveggja vikna verkefni, hámark.

Þá förum við aftur í góða, jarðbundna rútínu—sem, þegar öllu er á botninn hvolft, virkar best.“

Í hvaða verkefni ertu að vinna helst þessa dagana?

„Desembermánuður er oft mjög annasamur enda margir viðskiptavinir sem þurfa að klára ýmis mál fyrir áramót og þetta árið eru fáir vinnudagar á milli jóla og nýárs. Mörg verkefnanna tengjast kaupum og sölum á fyrirtækjum og að klára sameiningar og skiptingar þar sem þarf að hnýta alla lausa enda áður en fólk fer í frí.

Eins er ég að undirbúa mig fyrir nýtt hlutverk hjá PwC, ræða við samstarfsmenn mína um stöðuna, helstu áskoranir og hver eru mikilvægustu verkefnin sem ráðast þarf í á nýju ári.“

Hvernig skipuleggur þú þig í vinnu?

Ég reyni að vera agaður og set mér skýr markmið fyrir hvern dag. 

Ég tek frá tíma í dagatalinu þar sem ég bóka helst ekki fundi og nota þann tíma til einbeitingar í verkefnum.

Smærri verkefni afgreiði ég strax en þau stærri set ég annað hvort í dagatal eða á verkefnalista, eftir umfangi þeirra.

Ég nýti oftast sunnudaga í að skipuleggja vikuna gróflega jafnvel þótt ég viti að flest komi til með að breytast.

Mikilvægast fyrir mig er að lofa ekki upp í ermina á mér og gefa mér raunhæfan tíma til að sinna verkefnum vel.“

Hvenær ferðu að sofa á kvöldin?

„Garmin-úrið heldur utan um svefninn minn. Best gengur þegar ég fer upp í rúm rétt eftir klukkan tíu, skrolla aðeins í símanum - sem ég veit auðvitað að ég á ekki að gera - og er svo sofnaður um ellefu. Þegar þetta tekst fæ ég yfirleitt gott sleep score. Ég fúnkera nefninlega rosalega mikið eftir þessu skori. 

Það hefur meira að segja komið fyrir að konan mín hafi spurt hvort ég hafi sofið vel og mér fannst ég alveg endurnærður – þar til ég kíkti á úrið og sá slakt sleep score. Þá helltist þreytan skyndilega yfir mig og allt varð einhvern vegin miklu erfiðara.“