„Hann er ein stærsta á­stæðan fyrir því“

Línumaður íslenska landsliðsins hefur spilað fyrir gamla stórveldið Gummersbach síðustu fimm ár og skrifaði á dögunum undir framlengdan samning til næstu fjögurra ára.

„Eins og alltaf þá skoðaði maður sig aðeins um áður en maður tók lokaákvörðunina en þegar uppi er staðið var Gummersbach eina rétta svarið. Tilfinningin var að ég var ekki tilbúinn að fara í neitt annað lið í Þýskalandi“ sagði Elliði, sem skoðaði þó nokkur tilboð úr öðrum deildum.

Gummersbach var eitt sigursælasta lið Þýskalands og Evrópuhandboltans á síðustu öld en félagið var á slæmum stað þegar Elliði kom þangað.

Meistaradeildin næsta markmið 

Félagið var fallið niður í næstefstu deild en síðan þá hefur mikill uppgangur orðið, liðið komst aftur upp í úrvalsdeild og svo inn í Evrópudeildina á síðasta tímabili.

„Það er ákveðinn kjarni þarna sem er búinn að fara í gegnum þetta, sem er búinn að vera þarna síðustu fimm eða sex ár. Núna er komin ákveðin pressa á okkur að leiða liðið áfram. Hvort það sé raunhæft á þessu ári eða næsta ári verður að koma í ljós en það er klárlega yfirlýst markmið að koma Gummersbach aftur í Meistaradeildina á næstu árum…

…Við erum samt búnir að tapa óþarfa mörgum leikjum, ef við ætlum að halda okkur í toppbaráttunni, en á sama tíma verið í hörkuleikjum við bestu liðin. Við unnum Berlin, gerðum jafntefli við Kiel og töpuðum með einu marki á móti Magdeburg, þannig að sýnum að við eigum heima þarna en þurfum að vinna auðveldari leikina. Þó það séu ekki margir auðveldir leikir“ sagði Elliði um gengi og markmið liðsins.

Guðjón Valur kröfuharður en góður 

Þennan góðan árangur undanfarin ár segir hann að megi rekja til markahæsta landsliðsmanns Íslands frá upphafi, Guðjóns Vals Sigurðssonar, sem hefur þjálfað liðið síðan 2020.

„Hann er ein stærsta ástæðan fyrir því að við erum hérna og séum búnir að vera á svona uppgangi síðustu ár“ sagði Elliði og lýsti Guðjóni Val sem kröfuhörðum en góðum þjálfara.

Gummersbach á tvo leiki eftir fram að áramótum áður en hlé vegna Evrópumótsins hefst. Elliði mun koma til móts við landsliðið hér á landi þegar æfingar hefjast þann 2. janúar. 

Rætt var við landsliðsmanninn og leikmann Gummersbach í Sportpakka Sýnar í gærkvöldi. Innslagið má sjá í spilaranum að ofan.