Engin skoraði meira en Elín Klara

Seinni leikur liðanna fer fram í Danmörku næsta laugardag. Sigurvegarinn tryggir sér sæti í riðlakeppni Evrópudeildarinnar.

Elín skoraði sjö mörk í dag og var markahæst í liði Sävehof ásamt Stinu Wiksfors.

Sävehof var með undirtökin í fyrri hálfleik og náði mest fimm marka forskoti. Þremur mörkum munaði á liðunum í hálfleik, 17-14.

Elín og stöllur hennar héldu forskotinu lengi framan af seinni hálfleik og þegar níu mínútur voru eftir leiddi Sävehof með fjórum mörkum, 29-25.

Viborg skoraði næstu fimm mörk og komst yfir, 29-30. Danirnir komust aftur yfir, 30-31, en Mathilda Forsberg tryggði Svíunum jafntefli, 31-31, með því að skora síðasta mark leiksins.