Gamall þristur strand vegna skorts á bensíni

Dakota-vélin, sem kallast Spirit of Douglas, til heiðurs Donald Douglas, stofnanda Douglas-flugvélaverksmiðjanna, er á ferð um heiminn með kvikmyndatökulið um borð til að gera heimildarmynd um sögu DC 3-flugvélanna og brautryðjendastarfs Donalds Douglas í flugvélaframleiðslu. Ekki er þó ætlunin að kvikmynda hérlendis en flugvélin kom frá Kanada í gær. Áhöfnin hyggst halda áfram til Evrópu um leið og færi gefst og er núna stefnt á flugtak milli klukkan 9 og 10 í fyrramálið, samkvæmt upplýsingum flugafgreiðslufélagsins Reykjavík FBO.

Dregið hefur úr notkun hefðbundins flugvélabensíns eftir því sem flugvélum með gamla sprengihreyfla hefur fækkað. Flugvélar í innanlandsfluginu hérlendis eru núna almennt með túrbínuhreyfla sem ganga á steinolíu. Á Reykjavíkurflugvelli eru það helst kennsluflugvélar og einkaflugvélar sem brenna flugvélabensíni og því hefur birgðahald minnkað.

Þórður Guðjónsson, forstjóri Skeljungs, segir að ósk um kaup á fjögurþúsund lítrum af flugvélabensíni fyrir þristinn hafi borist með skömmum fyrirvara og þá hafi því miður verið lítið eftir í birgðatanknum. Svo óheppilega hafi viljað til að olíubíll hafi þá verið á leið til Egilsstaða með flugvélabensín. Hefðu Skeljungsmenn vitað fyrr af þessari ósk um kaup á flugvélabensíni hefði för olíubílsins austur verið seinkað. Bíllinn verði kominn til baka í fyrramálið og þá fái þristurinn bensín.

Flugvélin var upphaflega smíðuð árið 1942 í Douglas-verksmiðjunni í Santa Monica í Kaliforníu sem hernaðarútgáfan C-47 og síðan afhent breska flughernum til nota í heimsstyrjöldinni. Breski herinn notaði flugvélina einkum í Asíu í flugi með vistir milli Indlands og Kína. Við endursmíði hennar fékk hún nafnið Spirit of Douglas og í fyrra tók hún þátt í minningarathöfnum um D-daginn í Evrópu.

Þessi sama DC 3-vél, N8336C, hefur áður komið við sögu kvikmynda. Hollywood falaðist eftir henni fyrir kvikmyndina Ritchie Rich, um sögu ríkasta drengs heims, sem barnastjarnan Macaulay Culkin lék árið 1994.

Önnur fornleg flugvél á Reykjavíkurflugvelli virðist einnig vera strandaglópur. Sú er rússnesk tvíþekja af gerðinni Antonov An-2 á þýskum skráningarmerkjum. Hún var notuð í sumar til að fljúga með vistir til leiðangursmanna á Grænlandsjökli sem freistuðu þess að grafa upp herflugvél sem þar hafði nauðlent í síðari heimsstyrjöld.

Það gerist sífellt fátíðara að svo gamlar flugvélar sem þristar sjáist í Reykjavík. Í fyrra, þegar minnst var 80 ára afmælis D-dagsins, bauðst flugáhugamönnum þó sannkölluð þristaveisla, sem rifja má upp hér:

Fyrir sex árum flaug einnig fjöldi Dakota-flugvéla um Reykjavík þegar minnst var 75 ára afmælis innrásarinnar í Normandí: