Eir og Ísold mæta á EM

Þær Eir Chang Hlésdóttir og Ísold Sævarsdóttir eru báðar með lágmörk inn á mótið. Þess má til gamans geta að þær náðu lágmarki í fleiri greinum en þær taka þátt í á mótinu.

Þetta er í fyrsta sinn sem Eir og Ísold keppa á EM U20 en þær eru báðar fæddar 2007 og eru því aðeins 18 ára gamlar.

Þær eru samt sem áður svo sannarlega með mikla alþjóðlega keppnisreynslu og voru meðal þriggja íslenskra keppenda á EM U18 sem fram fór í Slóvakíu í fyrrasumar.

Þar keppti Eir í 400 metra hlaupi og komst hún í undanúrslit. Hún hljóp þar á 56,75 sekúndum og hafnaði í sautjánda sæti. Ísold keppti í sjöþraut og átti frábæra þraut þar sem hún bætti aldursflokkametið í flokki 16-17 ára þegar hún hlaut 5.643 stig og hafnaði í fimmta sæti.

Eir Chang Hlésdóttir keppir í 100 m hlaupi og 200 m hlaupi en hún náði lágmarki í 100 m hlaupinu núna í lok júní þegar hún hljóp á 11,69 sek og lágmarki í 200 m hlaupinu í ágúst í fyrra þegar hún hljóp á 24,30 sek. Auk þess náði Eir einnig lágmarki í 400 m hlaupi í maí 2024 þegar hún hljóp á 55,01 sek en hún mun ekki keppa í þeirri grein á þessu móti.

Eir hefur verið í miklu stuði

Eir hefur verið á svakalegri siglingu undanfarið og hefur verið virkilega gaman að fylgjast með þessari ungu íþróttakonu sem er greinilega í hörkuformi.

Frá því að hún náði lágmarki í 200 m hlaupinu síðasta sumar, þegar hún hljóp á 24,30, er hún búin að stórbæta tímann sinn í greininni, en hún er ríkjandi Íslandsmethafi í 200 m hlaupi bæði innanhúss og utanhúss.

Í vetur bætti hún 21 árs gamalt Íslandsmet Silju Úlfarsdóttur þegar hún hljóp á 23,69 sek og fyrr í sumar bætti hún sex ára gamalt Íslandsmet Guðbjargar Jónu Bjarnadóttur þegar hún kom í mark á 23,44 sek.

Þessi frábæri árangur Eirar er sjöundi besti árangur allra skráðra keppenda og á hún því góða möguleika á að komast í úrslit.