Son eftir­sóttur í LA og Tottenham til­búið að selja en ekki strax

Félagaskiptaglugginn í MLS deildinni opnaði í dag og stjórnarmenn félagsins í Los Angeles eru vongóðir um að festa kaup á Son áður en glugginn lokar aftur þann 21. ágúst.

Son er sagður vera ekki hluti af framtíðaráformum nýja þjálfarans Thomas Frank hjá Tottenham og félagið er sagt tilbúið að losa hann fyrir rétt verð, en helst ekki fyrr en eftir æfingaleikina í Suður-Kóreu.

Tottenham spilar nefnilega tvo æfingaleiki í Seoul, höfuðborg Suður-Kóreu, gegn Arsenal og Newcastle þann 31. júlí og 3. ágúst. Ef Son spilar þá leiki ekki mun Tottenham missa 75 prósent af tekjunum sem félagið fær fyrir að spila leikina.

Son er vinsælasti íþróttamaður Suður-Kóreu og hefur mesta aðdráttaraflið í Seoul. Það er einnig sagður hluti af ástæðunni fyrir því að LA FC vill fá hann til félagsins, í Los Angeles búa fleiri frá Suður-Kóreu en í nokkurri annarri borg í Bandaríkjunum.

Son hefur verið einn besti leikmaður ensku úrvalsdeildarinnar undanfarinn áratug og vann loksins titil með Tottenham þegar félagið vann Evrópudeildina í vor.