„Mikið undir fyrir bæði lið“

Skagamenn urðu fyrir slæmum skelli þegar þeir mættu KR í fyrri umferðinni, 5-0 tap varð niðurstaðan í Laugardalnum.

„Ég hef ekkert verið að spá í það. Sá leikur er bara búinn og tilheyrir fortíðinni. Nú er bara hörkuleikur í kvöld, þrjú mikilvæg stig í boði og fókusinn er bara á þennan leik. Ekkert annað“ sagði þjálfarinn í samtali við Vísi.

Lárus horfir fram veginn, ekki aftur, og var því spurður hverju hann ætti von á í kvöld.

„Ég á bara von á algjörum hörkuleik, á góðum grasvelli í góðu veðri. Mikið undir fyrir bæði lið þannig að ég á bara von á mikilli ástríðu og baráttu, stórbrotnum leik.“

Ekki meiri áherslubreytingar en gegn öðrum

KR spilar öðruvísi en öll önnur lið deildarinnar, þessum einstaka leikstíl fylgja einhverjar breytingar í áherslum Skagamanna, en ekkert meiri en fyrir leiki gegn öðrum liðum.

„Það er nú þannig með þessa blessuðu deild núna, þetta eru allt mjög erfiðir leikir. Það eru mismunandi áskoranir í öllum þessum leikjum, þeirra á meðal á móti KR.

Þetta er þriðji leikurinn sem ég þjálfa liðið, spiluðum á móti Vestra og Fram, svo er það KR núna. Í öllum þessum leikjum eru örlitlar áherslubreytingar. Þó við einbeitum okkur lang mest að okkar leik skoðum við líka hvernig andstæðingurinn spilar.

Þannig að, jújú það eru einhverjar áherslubreytingar þegar við spilum á móti KR, en það er ekki einsdæmi“ sagði Lárus.

Styrkir hópinn og fleiri á leiðinni

Lárus hefur aðeins stýrt liðinu í tveimur leikjum, unnið Vestra og tapað gegn Fram, en er strax farinn að styrkja hópinn. Jonas Gemmer skrifaði undir samning um helgina.

„Hann kom núna fyrir tveimur dögum síðan, er fluttur upp á Skaga og byrjaður að æfa með okkur. Mjög flottur leikmaður með yfir hundrað leiki í efstu deild Danmerkur og unglingalandsleiki. Varnarsinnaður miðjumaður sem við erum mjög spenntir að fá inn í leikmannahópinn“ sagði Lárus og hann leitar nú að fleiri leikmönnum.

„Það er ýmislegt í gangi og ég á von því að það komi fleiri fréttir mjög fljótlega“ sagði Lárus að lokum.