„Ég hef aldrei séð aðrar eins tölur“

„Ég var ánægðastur með að halda hreinu. Við ætluðum ekki að leggjast svona djúpt í síðari hálfleik en vandamálið var að loksins þegar við fengum boltann þá voru menn bara þreyttir og þungir og komust ekki fram völlinn. Við vorum mjög þéttir til baka og sættum okkur við að þurfa stundum að „suffera“ eins og menn vilja stundum segja á lélegri íslensku.“

Rúnar fór fögrum orðum um frammistöðu Más Ægissonar í leiknum í kvöld og kallaði hann vanmetinn leikmann.

„Hann hleypur ofboðslega mikið og skilar sér alltaf til baka. Hann hleypur manna mest í liðinu, bæði á spretti og í kílómetrum talið. Ég hef aldrei séð aðrar eins tölur. Maður er ekki alltaf að horfa í tæknilegu hliðina endilega, hann er ofboðslega mikilvægur fyrir liðið. Öll hans vinna með og án bolta er mikilvæg, við þjálfararnir sjáum það þó það séu ekki allir sem sjá það.“

Framarar eru komnir upp í 19 stig í deildinni og í efri helming deildarinnar. Rúnar segir stigasöfnun sumarsins ásættanlega og segir liðið horfa upp töfluna.

„Það er stutt út úr þessum pakka í topp sex og það er stutt niður í botnliðin, en það er ekkert svo langt í það að við getum farið að banka á dyrnar fyrir ofan okkur og við horfum þangað núna. Við erum að fara upp á Skaga næst og það er gríðarlega erfitt verkefni.“