Kerkez orðinn leik­maður Liverpool

Ungverjinn er sá fjórði sem Liverpool festir kaup á í sumar, á eftir Jeremie Frimpong og Florian Wirtz frá Bayer Leverkusen og markmanninum Armin Pecsi.

Kerkez flaug til Liverpool borgar frá heimalandinu síðasta mánudag og gekkst undir læknisskoðun í gær. Fimm ára samningurinn var svo undirritaður rétt áðan.

Hjá Liverpool var það Richard Hughes, yfirmaður knattspyrnumála, sem leiddi viðræðurnar. Maðurinn sem keypti Kerkez til Bournemouth frá AZ Alkmaar árið 2023, sem er talið hafa hjálpað við að sannfæra hann um að semja við Liverpool.

Bournemouth hefur nú þegar fest kaup á nýjum vinstri bakverði, Adrian Truffert frá Rennes, auk þess sem félagið fékk Julio Soler í janúar.

Óvíst er hvað verður um vinstri bakverðina sem eru nú þegar hjá Liverpool, Andy Robertson og Kostas Tsimikas, en þeir hafa báðir verið orðaðir við brottför.

Robertson vildi ekki ræða framtíð sína þegar Vísir náði af honum tali fyrir leik Skotlands gegn Íslandi fyrr í mánuðinum.