Eir Chang sló Ís­lands­met liðsfélaga síns og Ís­land vann 3. deildina

Eir Chang Hlésdóttir setti þriðja Íslandsmetið á Evrópubikarnum í frjálsíþróttum í dag þegar hún sló metið í 200 metra hlaupi.

Áður höfðu þær Andrea Kolbeinsdóttir (3000 metra hindrunarhlaup) og Irma Gunnarsdóttir (þrístökk) slegið Íslandsmet úti í Maribor í Slóveníu.

Eir Chang var þarna að slá Íslandsmet liðsfélaga síns því gamla metið átti Guðbjörg Jóna Bjarnadóttir sem er einnig að keppa fyrir Ísland í Evrópubikarnum.

Eir hljóp í dag á 23,44 sekúndum en metið hennar Guðbjargar frá árinu 2019 var 23,45 sekúndur.

Eir á nú bæði Íslandsmetið innan- og utanhúss í 200 metra hlaupi því hún sló fyrr á árinu 21 árs gamalt Íslandsmet Silju Úlfarsdóttur innanhúss um tíu sekúndubrot.

Íslenska sveitin stóð sig frábærlega og vann 3. deildina frekar örugglega. Liðið endaði með 460,5 stig en í öðru sæti var Lúxemborg með 409 stig. Moldóva var síðan í þriðja sætið með 386 stig.

Hér fyrir neðan er hægt að sjá hvernig dagurinn gekk fyrir sig.