Varð fyrir von­brigðum með samnings­til­boð Liver­pool

Það er breski miðillinn The Guardian sem segir frá núna í morgun en Konaté er á leiðinni inn í síðasta árið á núgildandi samningi sínum við Englandsmeistarana sem rennur út sumarið 2026. Óttast menn að þetta gæti orðið til þess að Konaté fari á frjálsri sölu frá Liverpool eftir rúmt ár.

Heimildir The Guardian herma að þessi 26 ára gamli leikmaður hafi orðið fyrir vonbrigðum með það hvernig samningstilboð Liverpool var sett upp, hann væri til í hærri grunnlaun fremur en fleiri árangurstengda bónusa. 

Upphaflega voru samningaviðræður við Konaté settar á ís þar sem að forráðamenn Liverpool vildu klára viðræður við lykilmennina Mohamed Salah og Virgil van Dijk um nýjan samning. 

Heimildir The Guardian herma að forráðamenn Liverpool ætli sér að gera aðra atlögu að samningaviðræðum við Konaté seinna í sumar en að þeir muni ekki spenna bogann endalaust hvað launakostnað varðar.