Á­tök Arnars og Óskars hófust í yngri flokkum: Dramatík í úr­slitum á Akur­eyri

Um þetta er fjallað í næstsíðasta þætti nýrrar seríu af Návígi, hlaðvarpsþáttum úr smiðju Gunnlaugs Jónssonar sem urðu til við vinnslu sjónvarpsþáttanna A&B um tvíburana Arnar og Bjarka Gunnlaugssyni. Umræðuna og líflegar lýsingar á því sem gerðist í úrslitaleiknum má heyra í þættinum hér að neðan, eftir 6:10 mínútur.

Óskar, Arnar og Bjarki eru jafnaldrar, fæddir 1973, og öttu kappi í yngri flokkum. Óskar var í fremstu víglínu KR í 3. flokki, með nánasta félaga Bjarka í umboðsmennskunni í dag, Magnús Agnar Magnússon, sér til fulltingis. 

Í liði ÍA voru menn sem áttu eftir að spila tugi landsleikja og sem atvinnumenn um árabil, eins og Arnar, Bjarki og varnarmaðurinn Lárus Orri Sigurðsson.

„Í þessum yngri flokkum voru þetta meiriháttar skemmtilegir leikir við Skagann. Ég held að í þessum árgangi hafi þessi tvö lið verið bestu liðin en það verður að segjast eins og er að það varð nú töluvert meira úr leikmönnunum í Skagaliðinu heldur en KR-liðinu,“ segir Óskar Hrafn sem þó náði að spila þrjá A-landsleiki og sem atvinnumaður í Noregi áður en hann lagði skóna á hilluna.

Sonur hans, Orri, er þegar kominn með 16 A-landsleiki og sjö mörk en hann var einmitt gerður að fyrirliða landsliðsins af Arnari og er skjólstæðingur Magnúsar Agnars og Bjarka.

„Óskar var bara framherji. Markamaskína eins og sonur hans. Við spiluðum kannski frekar einfaldan fótbolta. Sparkað langt og ég var stór svo ég gat skallað boltann og treysti því að Óskar myndi hirða boltann, stinga alla af og skora. Það var einfalt,“ rifjar Magnús Agnar upp.

Höfðu betur eftir að Óskar hafði stækkað

Lárus Orri fór fyrir vörn Skagaliðsins og er forvitnilegt að heyra þá Óskar rifja upp átökin sín á milli, sem jöfnuðust eftir því sem Óskar tók út líkamlegan þroska.

„Hann gekk helvíti vasklega fram við að taka á mér, og hafði nú yfirleitt betur þangað til kannski í þessum úrslitaleik ´89 þegar ég loksins mannaði mig upp, hafði stækkað aðeins og tók aðeins á honum,“ sagði Óskar sem kom KR í 4-0 snemma í seinni hálfleik, í afar óvæntum sigri KR-inga í úrslitaleiknum.

Bjarki og Lárus Orri nefndu báðir í þættinum hve mikið formsatriði það átti að vera fyrir ÍA að vinna leikinn við KR og verða Íslandsmeistari. Formaður ÍA fór sérstaka ferð til Akureyrar til að vera viðstaddur sigurinn en úr varð sneypuför.

„Það sem pirraði mig og Arnar mest var að það var ákveðið að úrslitaleikurinn yrði klukkan 11 um morguninn og spilaður á Þórsvellinum, á meðan leikurinn um 3. sætið var hálftvö á Akureyrarvelli. Á þeim tíma var Akureyrarvöllur bara Wembley. Þetta fór óendanlega í taugarnar á okkur,“ sagði Bjarki.

Óvæntar hetjur: Held að hann hafi ekki verið búinn að skora á æfingu í átta ár

Í úrslitaleiknum stigu fram óvæntar hetjur hjá KR og skoruðu draumamörk, miðað við lýsingar manna, þar á meðal Jón Páll Leifsson sem sagði:

„Við fórum með mildilegar væntingar inn í þennan úrslitaleik. Þjálfarinn okkar, Haraldur Haraldsson, mikill toppmaður, deildi þessum væntingum með okkur. Ég man sérstaklega eftir því að hann sagði fyrir leikinn: „Strákar, ég er mjög stoltur af ykkur. Þið eruð komnir í þennan úrslitaleik en ég ætlast ekki til að þið vinnið hann. Ef þið gerið það þá verð ég hins vegar ofsalega glaður.““

„Það hittist þannig á að flestir af okkur spiluðu toppleik og margir af þeim áttu slakan leik, því á pappírunum hefðum við sennilega aldrei átt að eiga möguleika. Við gerum út um þennan leik í fyrri hálfleik og skorum þrjú mörk,“ sagði Óskar.

„Þessir gaurar sem að skoruðu í þessum leik… þú veist ekki einu sinni hverjir þetta eru en allir skoruðu þeir upp í skeytin,“ sagði Bjarki og Óskar var sammála:

„Það voru ólíklegustu menn að skora. Jón Páll Leifsson skoraði fyrsta markið. Ég held að hann hafi ekki verið búinn að skora á æfingu í átta ár á undan.

Þetta er það sem menn rifja upp þegar ´73-árgangurinn í KR hittist, hversu fallegt eða sorglegt sem það er,“ sagði Óskar en nánari lýsingar má heyra í þættinum hér að ofan.

Hægt er að hlusta á alla þætti annarrar seríu Návígis á Tal.is með því að smella hér.