Peder­sen í tvö hundruð leikja klúbbinn í kvöld: „Skiptir mig miklu máli“

„Þetta skiptir mig miklu máli, er stór áfangi að ná. Eitt­hvað sem ég er mjög stoltur af. Ég bjóst klár­lega ekki við því að spila tvö hundruð leiki hér. En hérna erum við þó. Tvö hundruð leikjum síðar.“

Pat­rick viður­kennir fús­lega að hann hafi ekki séð það fyrir sér að ná þessum áfanga á Ís­landi eftir að hafa komið fyrst til Vals á láni frá Dan­mörku árið 2013.

„Planið hjá mér þá var að spila þessa tíu leiki sem eftir stæðu á tíma­bilinu og snúa svo aftur til Dan­merkur sanna mig þar. Valur lagði hins vegar mikið í að ná mér eftir það tíma­bil, mér leið mjög vel hér og ákvað því að snúa aftur.“

Og þrátt fyrir að hafa samið við önnur lið er­lendis inn á milli þá hefurðu alltaf endað aftur hér hjá Val. Það segir manni að landið og félagið á sér­stakan stað í hjarta þínu.

„Já ekki spurning. Ég kann mjög vel við mig hér. Það var auðvelt fyrir mig að aðlagast lífinu hér. Okkur fjöl­skyldunni líður eins og heima hjá okkur enda er hér margt eins og í Dan­mörku. Ég kann mjög vel við félagið og allt í kringum það.“

Haukur Páll Sigurðs­son, núverandi að­stoðarþjálfari Vals, spilaði með Pat­rick á sínum tíma og ber honum afar góða sögu.

„Þetta er einn af þeim betri leik­mönnum sem ég hef spilað með. Hann er bara magnaður,“ segir Haukur Páll. „Pat­rick hefur verið frábær síðan að hann kom til Ís­lands fyrir nokkuð mörgum árum síðan. Al­gjör happa­fengur fyrir Val.

Ég man bara alltaf eftir fyrstu æfingunni hjá honum með okkur árið 2013. Við fórum þar í skotæfingu og maður sá að maður hefði ekki æft með svona fram­herja áður. Það var nánast allt inni hjá honum á þessum æfingum. Við vorum ótrú­lega fegnir því að hann skyldi koma í Val og ég alltaf feginn að hann hafi komið aftur þegar að hann hefur farið út. Ótrú­lega góður strákur og liðs­félagi, yndis­legur gaur.“

Tvö hundruðasta leik Patrick Pedersen í efstu deild hér á landi má sjá í beinni útsendingu á Sýn Sport þegar að Stjarnan tekur á móti Val í 11.umferð Bestu deildar karla klukkan korter yfir sjö.