Spaun steig ekki feilspor en stór nöfn í brasi

Spaun, sem tapaði fyrir Rory McIlroy í bráðabana á The Players í mars, lék á 66 höggum í dag eða fjórum höggum undir pari.

Hann er einu höggi á undan Suður-Afríkumanninum Thriston Lawrence. Á meðal þeirra sem næstir koma þar á eftir eru Brooks Koepka á -2 höggum og Jon Rahm á -1 höggi en ljóst er að aðeins um tíu kylfingar klára fyrsta hringinn undir pari.

Völlurinn reyndist mörgum af bestu kylfingunum erfiður í dag og er Norður-Írinn Rory McIlroy til að mynda á +4 höggum, og Bryson DeChambeau á +3 höggum.

„Þessi golfvöllur getur náð þér ansi fljótt og maður verður bara að vera upp á sitt allra besta. Hann náði mér og ég var ekki upp á mitt besta, svo ég er frekar vonsvikinn með mína spilamennsku. En það munar ekkert allt of miklu. Ég verð að ná púttunum aðeins betur og þá kemur þetta, því 3 yfir hefði alveg getað verið 2 undir í dag,“ sagði DeChambeau.

STAÐAN Á MÓTINU

Spaun fékk fjóra fugla á fyrstu átta holunum í dag og fékk eins og fyrr segir ekki einn einasta skolla.

„Ég kom hingað án þess að hafa neina sögu hérna á Oakmont, vissi í raun ekki við hverjum væri að búast, líka hvað Opna bandaríska varðar. Þetta er bara annað skiptið mitt. Ég veit ekki hvort það létti eitthvað á mér en ég reyndi bara einhvern veginn að taka það sem völlurinn gaf mér,“ sagði Spaun eftir hringinn.

Hann viðurkenndi að völlurinn væri erfiður og að leiðin að árangri væri að geta bjargað sér úr erfiðum aðstæðum, sem hann hefði gert afar vel í dag.

Keppni á Opna bandaríska heldur áfram fram á sunnudag en bein útsending frá öðrum keppnisdegi hefst klukkan 16 á Sýn Sport Viaplay.