Man. Utd með í slaginn um Ekitike

Ekitike hefur áður verið sagður í sigti Chelsea og Liverpool en talið er að Frankfurt hafi sett 100 milljóna evra verðmiða á kappann.

Ekitike er 22 ára gamall og hefur leikið eina og hálfa leiktíð með Frankfurt og áður eina leiktíð með PSG en hann er uppalinn hjá Reims. Þá var hann að láni hjá Vejle í Danmörku í hálft ár, 18 ára gamall.

Florian Plettenberg, blaðamaður Sky í Þýskalandi, segir að Englandsmeistarar Liverpool og Sambandsdeildarmeistarar Chelsea séu áfram að keppast um að landa Ekitike. United hafi svo á síðustu tveimur sólarhringum lýst yfir alvöru áhuga á honum og fengið allar nauðsynlegar upplýsingar.

Chelsea er sagt vilja auka samkeppnina fyrir Nicolas Jackson í sumar og Liverpool er sagt vilja mann í staðinn fyrir Darwin Nunez.

Miðað við síðustu leiktíð þarf United svo nauðsynlega á markaskorara að halda, þó að félagið hafi í dag kynnt hinn brasilíska Matheus Cunha til leiks og greiði Wolves 62,5 milljónir punda fyrir. United hefur áður verið orðað við Viktor Gyökeres, Benjamin Sesko og Liam Delap sem í síðustu viku gekk í raðir Chelsea.