Enski boltinn

Kerkez spilar ekki með Ung­verjum: Sagður á leið til Liverpool að skrifa undir

Ágúst Orri Arnarson skrifar
Milos Kerkez mun ekki spila með Ungverjalandi gegn Svíþjóð á morgun. Hann er sagður á leið til Liverpool.
Milos Kerkez mun ekki spila með Ungverjalandi gegn Svíþjóð á morgun. Hann er sagður á leið til Liverpool. Alex Caparros - UEFA/UEFA via Getty Images

Félagaskipti Milos Kerkez frá Bournemouth til Liverpool virðast vera á lokametrunum. Leikmaðurinn mun ekki spila með ungverska landsliðinu á morgun og er sagður á leið til Liverpool að ganga frá læknisskoðun og samningsmálum.

Kerkez var einn af betri vinstri bakvörðum ensku úrvalsdeildarinnar á síðasta tímabili og eftirsóttur af Liverpool og Manchester City meðal annars. Hann er metinn á um 45 milljónir punda.

Hjá Liverpool er það Richard Hughes, yfirmaður knattspyrnumála, sem leiðir viðræðurnar. Maðurinn sem keypti Kerkez til Bournemouth frá AZ Alkmaar árið 2023, sem er talið hafa hjálpað við að sannfæra hann um að semja við Liverpool.

Milos Kerkez var einn besti vinstri bakvörður ensku úrvalsdeildarinnar á síðasta tímabili. Robin Jones - AFC Bournemouth/AFC Bournemouth via Getty Images

Viðræðurnar hafa gengið vel og nú hefur Marco Rossi, landsliðsþjálfari Ungverjalands, sagt að Kerkez spili ekki leikinn gegn Svíþjóð á morgun. Engin meiðsli voru nefnd í því samhengi og spekingar spá því að ástæða fjarverunnar sé ferðalag til Liverpool.

Liverpool var í leit að hægri bakverði eftir brotthvarf Trent Alexander-Arnold frá félaginu til Real Madrid og samdi við Jeremie Frimpong frá Bayer Leverkusen. 

Þá er talið að vinstri bakvörðurinn Andy Robertson yfirgefi félagið í sumar og fari mögulega til Celtic í heimalandinu Skotlandi. Mögulega taki Robertson þó að sér hlutverk varamanns á næsta tímabili, ef Kostas Tsimikas verður seldur. Kerkez er hugsaður sem byrjunarliðsmaður í vinstri bakverðinum. 




Fleiri fréttir

Sjá meira


×