Í bann eftir að hafa montað sig af dólgslátum

Maðurinn stærði sig af því á samfélagsmiðlum að hafa tekið Thomas á taugum með því að kalla á hana og þannig náð að tryggja sér sigur í veðmálum sem hann gerði hjá veðmálasíðunni FanDuel, um hver myndi vinna 100 metra hlaupið á Grand Slam Track móti í Philadelphia.

Thomas, sem varð Ólympíumeistari í 200 metra hlaupi í fyrra, endaði í 4. sæti í hlaupinu um helgina en Melissa Jefferson-Wooden kom fyrst í mark, eins og maðurinn hafði veðjað á.

Thomas skrifaði á Twitter: „Þessi fullorðni maður elti mig um hlaupabrautina þar sem ég var að taka myndir með og skrifa eiginhandaráritanir fyrir aðdáendur (aðallega börn), og hrópaði persónulegar móðganir. Það er viðbjóðslegt að veita honum vettvang á netinu.“

FanDuel hefur nú sett manninn í bann eins og fyrr segir og kveðst fyrirtækið „fordæma af öllu afli móðgandi hegðun í garð íþróttafólks. Að ógna eða áreita íþróttafólk er óásættanlegt og á ekki heima í íþróttum. Þessi viðskiptavinur getur ekki lengur veðjað hjá FanDuel.“

Grand Slam Track er ný mótaröð hlaupagoðsagnarinnar Michael Johnson. Í tilkynningu frá mótaröðinni segir að málið verði rannsakað og unnið sé að því að finna út hver maðurinn sé sem áreitti Thomas, til að hægt sé að grípa til viðeigandi aðgerða. Svona hegðun sé viðbjóðsleg og algjörlega óviðunandi.

CNN bendir á að þessar fréttir fylgi á eftir fleiri fréttum af áreitni í garð íþróttakvenna. Bent er á sænsku skíðagöngukonuna Fridu Karlsson en maður sem áreitti hana á sextán mánaða tímabili, meðal annars með því að hringja 207 sinnum, skilja eftir talskilaboð og textaskilaboð, nálgast hana og þar á meðal vera fyrir utan heimili hennar, var dæmdur til að greiða 40.000 sænskar krónur í sekt.

Þá handtók lögreglan í Sameinuðu arabísku furstadæmunum mann í febrúar sem hafði áreitt bresku tennisstjörnuna Emmu Raducanu.