Körfubolti

Bad­mus á förum en Valur heldur ís­lenskum lykilmönnum

Sindri Sverrisson skrifar
Kristófer Acox, fyrirliði Vals, með bikarinn eftir að liðið varð bikarmeistari í vetur.
Kristófer Acox, fyrirliði Vals, með bikarinn eftir að liðið varð bikarmeistari í vetur. vísir/Diego

Bikarmeistarar Vals hafa endurnýjað samninga við nokkra af helstu lykilmönnum sínum í körfubolta. Taiwo Badmus virðist hins vegar hafa leikið sinn síðasta leik fyrir liðið.

Körfuknattleiksdeild Vals greinir frá því í dag að þeir Kristófer Acox, Kári Jónsson, Hjálmar Stefánsson, Frank Booker og Ástþór Atli Svalason hafi allir skrifað undir nýja samninga við félagið.

Kristinn Pálsson endurnýjaði samning sinn við Val í fyrra og er áfram samningsbundinn félaginu til sumarsins 2026. Íslenskir lykilmenn liðsins verða því allir áfram.

Samkvæmt upplýsingum Vísis hefur hins vegar ekki verið samið við Badmus sem verið hefur í lykilhlutverki síðustu tvær leiktíðir, og er hann því að óbreyttu á förum frá Hlíðarenda. Hann var áður lykilmaður í liði Tindastóls í tvo vetur og náði því að verða Íslandsmeistari tvö ár í röð, með Stólunum 2023 en Val 2024.

Taiwo Badmus varð bæði Íslands- og bikarmeistari á árunum tveimur hjá Val. Hann var valinn mikilvægastur í bikarúrslitunum í ár.vísir/Diego

Valsmenn segja í tilkynningu að undirbúningur fyrir næsta tímabil sé farinn á fullt og unnið sé að því að klára að setja saman leikmannahópinn sem fyrst. Frekari fréttir af leikmannamálum verði birtar jafnóðum.

Kári búinn að jafna sig af meiðslunum

Þá er þess getið að Kári Jónsson hafi nú jafnað sig vel að meiðslunum sem hann hlaut í úrslitakeppninni og verði kominn á fullt innan skamms.

Þrátt fyrir bikarmeistaratitil olli nýafstaðin leiktíð vonbrigðum á Hlíðarenda. Valsmenn, sem urðu í fyrra Íslandsmeistarar í annað sinn á þremur árum, urðu nefnilega að sætta sig við að falla úr leik í 8-liða úrslitum Bónus-deildarinnar í vor, eftir tap gegn Grindavík. Meiðsli Kára settu þar stórt strik í reikninginn. Óhætt er að ætla að tekjur félagsins í ár verði því mun minni en þrjú síðustu ár á undan, þegar Valsmenn komust alla leið í oddaleik í úrslitum í hvert sinn með tilheyrandi miða- og veitingasölu á vel sóttum heimaleikjum sínum.




Fleiri fréttir

Sjá meira


×