Var í góðum séns en missti af sæti á Opna bandaríska

Ágúst Orri Arnarson skrifar 3. júní 2025 11:02

Dagbjartur átti flottan fyrri hring og var í fínum séns. Octavio Passos/Getty Images

Dagbjartur Sigurbrandsson náði ekki að tryggja sér sæti á Opna bandaríska meistaramótinu í golfi, hann endaði jafn í 38. sæti á lokaúrtökumóti í Columbus, Ohio í Bandaríkjunum í gær. Dagbjartur var í tólfta sæti eftir fyrri hringinn en sá seinni reyndist honum erfiður.

Lokaúrtökumótið er síðasta stigið í átt að þátttöku í einu af fjórum risamótum golfsins. Þar leika kylfingar 36 holur á einum degi, og aðeins þeir sex efstu tryggja sér sæti.

Dagbjartur var jafn í tólfta sæti eftir fyrri hringinn, einu höggi undir pari. Seinni hringur mótsins reyndist honum hins vegar erfiður og lauk Dagbjartur leik á þremur höggum yfir pari í heildina. Nánar má lesa um leik Dagbjarts á heimasíðu Golfsambandsins.

Árangurinn engu að síður ágætur, 38. sæti af 67. keppendum, hjá einum efnilegasta kylfingi Íslands. Undankeppnin í Columbus er þekkt fyrir að vera ein sú allra erfiðasta. Ástæðan fyrir því er að Memorial mótið á PGA mótaröðinni sem fór fram um helgina er einnig haldið í Ohio í Bandaríkjunum.

Margir kylfingar sem eru ekki þegar með þátttökurétt á opna bandaríska nýta sér stutta ferðalagið og mæta beint í úrtökumótið.

Gunnlaugur Árni Sveinsson lék í öðru lokaúrtökumóti fyrir opna bandaríska þann 19. maí og var ekki langt frá því að ná alla leið.

Golf Opna bandaríska