Dagur bikar­meistari eftir mara­þon víta­keppni

Montpellier var þremur mörkum yfir, 28-25, þegar tæpar níu mínútur voru eftir af venjulgeum leiktíma en skoraði ekki eitt einasta mark eftir það. PSG náði að jafna og fékk svo lokasóknina en náði ekki að nýta hana.

Því var strax gripið til vítakeppni sem átti eftir að reynast afar löng því bæði liðin tóku tíu víti áður en úrslitin voru ráðin en PSG nýtti sjö þeirra og Montpellier átta.

PSG fékk tækifæri til að tryggja sér sigur í vítakeppninni en Egyptinn Yahia Omar nýtti ekki fimmta víti liðsins og höfðu bæði lið þá klúðrað tveimur vítum. Liðin nýttu svo vítin sín þar til að kom að fimmtu umferð í bráðabana en þá varði Rémi Desbonnet frá Omar og tryggði Montpellier sigur.

Dagur var í leikmannahópi Montpellier en kom ekki við sögu í leiknum. Hann er á förum frá félaginu eftir að hafa komið í febrúar frá Arendal í Noregi, eftir að Svíinn Lucas Pellas sleit hásin.

Þó að þetta hafi verið fyrsti titill Montpellier síðan árið 2018 þá er félagið afar sigursælt og var þetta fjórtándi bikarmeistaratitill þess.

PSG stefndi á tvennuna en liðið er með þriggja stiga forskot á Nantes á toppi frönsku deildarinnar, þegar fjórar umferðir eru eftir.

Næst á dagskrá hjá Degi og félögum er úrslitahelgin í Evrópudeildinni en liðið mætir Kiel í undanúrslitum á laugardaginn, í Hamburg. Í hinum undanúrslitaleiknum mætast Melsungen og Flensburg.