Út­boðið fari vel af stað og allar líkur á að magnið aukist

Útboðið hófst klukkan hálfníu í morgun. Almenningur getur tekið þátt í útboðinu en þrjár tilboðsbækur standa kaupendum til boðanna. Þær eru ólíkar hvað varðar forgang, stærð og úthlutun. Eins og þegar hefur komið fram hafa þegar verið mótteknar pantanir umfram grunnmagn, það er sem nær til tuttugu prósent útistandandi hlutafés. Almenningur nýtur forgangs gagnvart lögaðilum og lögaðilar njóta forgangs gagnvart fjárfestum.

Myllusteinn um háls markaðarins

Hörður segir fjárfesta hafa beðið óþreyjufulla eftir útboðinu í marga mánuði. Útboðið hafi verið eins og myllusteinn um hálsinn á markaðinum.

„Lífeyrissjóðir og aðrir stórir fjárfestar eru búnir að vera með peninga klára á hliðarlínunni til að taka þátt í þessu útboði. Bæði vegna stórra arðgreiðslna sem hafa komið frá félögum í kauphöllinni að undanförnu, eins háar fjárhæðir sem komu í byrjun ársins við yfirtöku JPT á Marel. Að lokum ef við lítum á innlán almennings er það í sögulega háum hæðum þannig að þar er líka fjármang sem gæti leitað inn í þetta útboð. Aðstæður eru að teiknast upp með frekar góðum hætti,“ segir Hörður.

Hörður segir að miðað við kröftuga byrjun séu allar líkur á því að ríkissjóður muni auka magn hluta í útboði. Hann segist ekki vita hvort ríkið selji allan 45,2 prósenta hlutinn sinn.

„Ríkið þarf að huga að ákveðinni jafnvægislist, það má ekki þurrausa markaðinn nema umframeftirspurnin af hálfu fjárfesta verði það mikil að hún gefi færi á því,“ segir Hörður.

Gagnsærra en síðast

Útboðsgengið fyrir tilboðsbók A sem stendur almenningi til boða er 106,56 krónur á hlut en markaðsgengi var í gær 114,5 krónur. Það jafngildir tæplega sjö prósenta afslætti.

„Það er vissulega verið að veita ríflegan afslátt ef maður notar það orð miðað við gengið sem var á lokuðum markað í gær. Síðan á eftir að koma í ljós hvernig gengið verður í hinum tilboðsbókunum sem er beint að lífeyrissjóðum, verðbréfasjóðum, fjárfestingafélögum og erlendum fjárfestum. Ég á frekar von á því að gengið í þeim tilboðsbókum verði hærra og maður vonar það fyrir hönd ríkissjóðs, seljandans. Ef allt gengur vel gæti þetta orðið líka vítamínsprauta fyrir markaðinn ef við fáum þétta þátttöku almennings í bland við fjárfesta þá mun það lofa góðu um framhaldið,“ segir Hörður.

Er útboðið gagnsærra en síðast?

„Það er gagnsærra vegna þess að verið er að markaðssetja útboðið til almennings. Það felur í sér að það þarf að veita meiri upplýsingar, það þarf að birta skráningarlýsingu og það hefur þá kosti í för með ser að það sé meira jafnræði en á móti þessu kemur þá fylgir þessu meiri kostnaður fyrir ríkissjóð og líklegt að ríkið fái örlítið lægra verð heldur en ella,“ segir Hörður Ægisson, ritstjóri Innherja.