Fimm mörk að meðal­tali í leik hjá KR

KR gerði 3-3 jafntefli við Íslandsmeistara Breiðabliks á Kópavogsvelli í gær. KR-ingar lentu 2-0 undir, jöfnuðu og komust yfir en Blikar jöfnuðu í uppbótartíma. KR er í 4. sæti með sjö stig eftir fimm umferðir og er eina taplausa liðið í deildinni.

Markatala KR er 15-10 og því hafa verið skoruð samtals 25 mörk í leikjum liðsins. Það gera fimm mörk að meðaltali í leik.

Sjö leikmenn KR hafa skorað mörkin fimmtán sem liðið hefur gert. Jóhannes Kristinn Bjarnason hefur skorað fjögur mörk, Luke Rae og Eiður Gauti Sæbjörnsson þrjú hvor, Aron Sigurðarson tvö og Matthias Præst, Gabríel Hrannar Eyjólfsson og Finnur Tómas Pálmason eitt mark hver.

Verða ekki sigraðir

Eftir leikinn á Kópavogsvelli kvaðst Óskar Hrafn Þorvaldsson, þjálfari KR, vera hreykinn af sínu liði.

„Fyrst og fremst er ég auðvitað bara mjög stoltur af liðinu, sagði við þá inni í klefa eftir leik að þeir byggju yfir mikilvægasta hráefninu sem þú getur haft þegar þú ert að búa til lið. Sem er að vita ekki hvenær þú átt að gefast, vita ekki hvenær þú ert í vonlausri stöðu. Þeir héldu áfram og áfram og áfram. Við spiluðum okkar leik, alls ekki allt sem heppnaðist, eðlilega þar sem við erum að spila á móti Íslandsmeisturunum á heimavelli. Þeir eru alltaf að fara gera þér lífið erfitt, en það er bara svo mikill karakter í þessu liði,“ sagði Óskar í samtali við Vísi.

Næsti leikur KR er gegn ÍBV á AVIS-vellinum í Laugardalnum á laugardaginn kemur. Eyjamenn eru með sjö stig líkt og KR-ingar.