Fagnaðar­læti Púlara mældust á jarð­skjálfta­mælum

Liverpool tryggði sér sinn tuttugasta Englandsmeistaratitil með 5-1 sigri á Tottenham á Anfield á sunnudaginn.

Stemmningin á Anfield var gríðarlega mikil og raunar svo mikil að fagnaðarlætin á vellinum mældust á jarðskjálftamælum.

Fagnaðarlætin eftir að Alexis Mac Allister kom Liverpool í 2-1 á 24. mínútu mældust til að mynda 1,74 á Ritcher samkvæmt rannsókn háskólans í Liverpool. Rannsóknin var unnin af þremur vísindamönnum við skólann í samstarfi við félagið.

Eftir að Mohamed Salah skoraði fyrir framan Kop-stúkuna á Anfield í seinni hálfleik mældust fagnaðarlæti Púlara 1,60 á Ritcher.

„Eldmóður stuðningsmannanna var bókstaflega nógu mikill til hreyfa jörð,“ sagði prófessorinn Ben Edwards um fagnaðarlætin.

Rúmlega sextíu þúsund manns voru á leiknum á sunnudaginn og sáu Liverpool vinna enska meistaratitilinn í annað sinn á fimm árum.