Sjáðu stór­kost­leg mörk Bar­ca og Inter

Segja má að mörkin hafi verið hvert öðru glæsilegra en þau má sjá öll í spilaranum hér að neðan.

Inter komst yfir eftir aðeins þrjátíu sekúndna leik, þegar Marcus Thuram skoraði afskaplega fallegt mark með hælspyrnu, eftir sendingu frá Denzel Dumfries. Hollendingurinn átti svo sjálfur eftir að skora seinni tvö mörk Inter.

Dumfries kom Inter í 2-0 með frábærri hjólhestaspyrnu á 21. mínútu og sjálfsagt margir stuðningsmanna Barcelona þá orðið órólegir.

Þá var hins vegar komið að hinum 17 ára gamla Lamine Yamal. Hann minnkaði muninn gjörsamlega upp á sitt einsdæmi, með einleik og mögnuðu skoti í stöng og inn, allt í anda Lionels Messi.

Ferran Torres jafnaði svo metin af stuttu færi fyrir hálfleik, eftir skallasendingu Raphinha.

Dumfries bætti við þriðja marki Inter á 63. mínútu en strax í kjölfarið náði Barcleona að jafna, með rosalegu skoti Raphinha utan teigs eftir hornspyrnu. Markið skráist reyndar sem sjálfsmark því boltinn fór í þverslána og þaðan í markvörðinn Yann Sommer og inn.

Mörkin urðu ekki fleiri og því enn allt í járnum fyrir seinni leikinn á Ítalíu næsta þriðjudag sem ræður því hvort þessara liða fer í úrslitaleikinn.