„Ég fer bara sáttur á koddann“

„Mér fannst við ná að spila fínan fótbolta. Alls ekki einhver leikur sem maður horfir á og var fullkominn. Mér fannst við ná mörgum sóknum, við byrjuðum af miklum krafti en mér fannst við aðeins líða fyrir vondar ákvarðanir á síðasta þriðjung, vorum að flýta okkur of mikið,“ sagði Óskar Hrafn eftir leikinn í Hafnarfirði.

Fyrsta mark FH kom eftir skalla úr hornspyrnu og segir Óskar að þeir réðu ekki nægilega vel við föst leikatriði hjá Hafnfirðingum.

„Við réðum illa við leikatriðin hjá þeim og þegar rauða spjaldið kemur þá er það bara ærið verkefni að reyna brjóta þessa fimm-fjóra lágblokk þeirra með því að spila í gegnum þá. Það er bara erfitt, við náðum því nokkrum sinnum. Við vorum nokkrum sinnum nálægt, tánni frá því eða skrefinu frá því að opna þá en við náðum ekki markinu.“

Hafnfirðingar léku einum færri mest allan seinni hálfleik eftir að Björn Daníel Sverrisson fékk rautt spjald. Óskar hrósar andstæðingum sínum fyrir vaska frammistöðu.

„Við verðum að hrósa FH-liðinu að skilja allt eftir á vellinum. Það sást á því, hvernig þeir lögðu leikinn upp, hversu mikilvægur hann var fyrir þá og bara virkilega vel gert.“

Sáttur með stig á erfiðum útivelli

Leikurinn fór fram á Kaplakrikavelli og var fyrsti leikur tímabilsins sem var leikinn á grasvelli. Óskar Hrafn segir að það sé ekki gefið að koma á Kaplakrikavöll og sækja þrjú stig.

„Ég stýrði Blikum hérna margoft og er að stýra KR-liðinu í fyrsta sinn og ég veit alveg hversu erfiður útivöllur Krikinn er. Ég fer bara sáttur á koddann, þetta er lærdómur fyrir okkur en við þurfum að vera aðeins betri. Þetta er ekki alveg okkar leikur að spila út fyrir lið í fyrirgjafarstöðum og gefa hann inn í, þurfum að vera aðeins betri í því,“ sagði Óskar.

„Við hefðum getað verið aðeins grimmari í návígum á miðsvæðinu en þeir voru grimmari þar en heilt yfir bara sáttur. Maður getur farið og skallað vegginn útaf við vorum 35 mínútur einum fleiri en þeir vörðust vel og gef þeim það,“ bætti Óskar við.

Vesturbæjarliðið hefur nú sótt jafntefli í öllum þremur leikjum tímabilsins. Óskar segist ekki vera stressa of mikið þó að þeir bíða enn eftir fyrsta sigrinum.

„Ef maður horfir til þess að við erum búnir að spila á Akureyri, Kaplakrika og á móti Val. Ef þú horfir á það hversu mikið við höfum þurft að breyta liðinu milli leikja og ekki náðst þessi stöðugleiki sem mann dreymir um sem þjálfara. Stöðugleiki í liðið, hvernig maður stillir því upp, þá getum við verið sáttir með þessi þrjú stig. Það eru 24 leikir eftir og 72 stig í pottinum og engin ástæða að vera stressa sig sérstaklega mikið.“

Vicente fékk að velja

Vicente Valor kom til KR fyrir tímabilið frá ÍBV en hélt aftur til Vestmannaeyja eftir aðeins tvo leiki með KR.

„Það kom tilboð frá ÍBV sem var mjög sanngjarnt og þegar það kemur tilboð er þess eðlis að við tökum alvarlega þá gáfum honum kost á því að velja. Hann hefur verið inn og út úr liðinu hjá okkur og núna er Aron Þórður kominn á fullt þannig hann var að berjast um sæti í liðinu. Hann fékk í raun og veru að velja, mér finnst það sanngjarnt gagnvart leikmanninum. Ferillinn er stuttur og leikmenn vilja spila,“ sagði Óskar að lokum um vistaskipti Vicente.