Enski boltinn

Vildi halda á­fram að spila eftir tæklinguna hrylli­legu

Runólfur Trausti Þórhallsson skrifar
Mateta mun leika með grímu fyrst um sinn eftir að hann snýr aftur.
Mateta mun leika með grímu fyrst um sinn eftir að hann snýr aftur. Sebastian Frej/Getty Images

Jean-Philippe Mateta, leikmaður Crystal Palace, sagði í viðtali við Sky Sports að hann hafi viljað halda leik áfram eftir að Liam Roberts, markvörður Millwall, gerði sitt besta til að gata andlit franska framherjans.

Crystal Palace lagði Millwall 3-1 þegar liðin mættust í 5. umferð ensku bikarkeppninnar. Úrslitin ein og sér vöktu svo sem ekki mikla athygli en skelfileg tækling Roberts gerði það hins vegar.

Markvörðurinn var rekinn af velli og á endanum dæmdur í sex leikja bann. Mateta var hins vegar sendur á sjúkrahús þar sem sauma þurfti 25 spor í höfuð hans.

Mateta sjálfur gerði sér ekki grein fyrir á vellinum hversu slæmt sár hans væri og reyndi að sannfæra lækni Palace-liðsins um að leyfa sér að klára leikinn.

„Ég vildi bara þrífa blóðið og halda áfram. Ég reyndi að sannfæra lækninn í hálfa mínútu. Hann gat hins vegar séð sárið en ekki ég. Eyrað hékk nærri af en ég fann þó ekki fyrir því,“ sagði Mateta í viðtalinu við Sky Sports. Mateta sagði jafnframt að Roberts hefði beðist afsökunar og að hann hefði fyrirgefið markverðinum.

Hinn 27 ára gamli Mateta hefur skorað 12 deildarmörk á leiktíðinni og vonast til að snúa aftur á völlinn sem fyrst.


Tengdar fréttir

Mateta líður vel þrátt fyrir tæklingu í and­litið

Jean-Philippe Mateta, framherji Crystal Palace, er á batavegi eftir að enda upp á spítala eftir stórundarlega tæklingu markvarðarins Liam Roberts þegar Palace lagði Millwall í enska bikarnum í dag. Tæklingin hefði getað stórslasað framherjann og jafnvel endað feril hans.

Sex leikja bann fyrir brotið á Mateta

Liam Roberts, markvörður enska B-deildarliðsins Millwall, hefur verið úrskurðaður í sex leikja bann fyrir brotið grófa á Jean-Philippe Mateta, framherja Crystal Palace, í bikarleik liðanna um síðustu helgi.




Fleiri fréttir

Sjá meira


×