Gunnar kveður og Stefán tekur við

Stefán hefur verið aðstoðarþjálfari Aftureldingar undanfarin þrjú ár ásamt því að þjálfa þriðja flokk karla hjá félaginu en sá flokkur varð Íslandsmeistari í fyrravor.

Stefán mun jafnframt vera yfirþjálfari yngri flokka. Í tilkynningu Aftureldingar segir að Stefán hafi verið afar mikilvægur hlekkur í afreksstarfi yngri flokka félagsins og stutt vel við þróun ungra og efnilegra leikmanna í fyrstu skrefunum í meistaraflokki.

Gunnar og Stefán fögnuðu bikarmeistaratitli með Aftureldingu árið 2023 þegar bundinn var endir á 24 ára bið eftir titli í Mosfellsbænum. Þá lék liðið til úrslita gegn FH um Íslandsmeistaratitilinn í fyrravor þegar mikil stemning myndaðist og áhorfendamet var sett að Varmá með komu um 1.700 áhorfenda.

Í tilkynningu Aftureldingar segir enda að í stjórnartíð Gunnars hafi starfsemi handknattleiksdeildar félagsins verið lyft upp á nýtt stig og liðið komist í þá stöðu að berjast um alla titla sem í boði séu.

Áður en að lyklaskiptunum kemur munu þeir Gunnar og Stefán ljúka yfirstandandi leiktíð saman en eftir að hafa fallið út í undanúrslitum Powerade-bikarsins í síðustu viku keppir Afturelding nú um deildarmeistaratitilinn og er tveimur stigum á eftir toppliði FH. Úrslitakeppnin bíður svo í vor.