Að taka því ekki per­sónu­lega hvernig týpa þinn yfir­maður er

En kannski gæti það hjálpað að skilja betur hvers konar týpa yfirmaðurinn okkar telst vera sem stjórnandi og vinna síðan í því sjálf að efla okkur gagnvart þeirri týpu.

Í gær og í dag rýnir Atvinnulífið í fjórar týpur stjórnenda og hvernig starfsfólk getur eflt sjálft sig í að vinna með þeim sem helst á við á þeirra vinnustað.

Góðu ráðin: Hver er þín týpa?

Týpurnar fjórar sem um ræðir kallast Yfirboðarinn, Klappstýran, Umönnunaraðilinn og Regluvörðurinn. Skilgreiningarnar eru miðað við þær týpur sem fram koma í bókinni Managing Up: How to Get What You Need from the People in Charge by Melody Wilding og kom út núna í vikunni.

Hér er hægt að lesa nánar um hverja týpu fyrir sig.

En eitt er að skilja hvernig týpa yfirmaðurinn okkar er og annað er að líða vel í samstarfinu með honum/henni.

Hér eru nokkur góð ráð miðað við samvinnu við hverja og eina týpu.

1. Yfirboðarinn (e. The Commander)

Ekki taka því persónulega þótt þessi yfirmaður gagnrýni hugmyndir eða skoðanir sem þú viðrar. Því þessi stjórnandi á það til að nýta þessa aðferðarfræði til að testa þig, sjá hvernig þú bregst við því álagi að þurfa að standa frammi fyrir svörum. Þetta er líka aðferð þessarar týpu til að forðast mistök og virka sterkari sem leiðtogar sjálfir. Þess vegna er einfaldlega gott að horfa frekar á þessi samtöl sem eitthvað sem einkennir þessa týpu stjórnanda, frekar en að vera að taka þessu persónulega til þín eða upplifa gagnrýnina eða samtalið sem einhvers konar gagnrýni á þig og þín störf.

Annað sem gott er að hafa í huga þegar þú vinnur með þessari týpu er að vera ekkert að eyða tíma í óþarfa spjall. Því þessi týpa er alltaf að vinna og finnst tíminn svo verðmætur að honum megi ekki sóa í óþarfa. Að nálgast viðkomandi með því að segja eitthvað eins og ,,Ég veit þú ert upptekin/n þannig að ég vind mér bara beint í erindið…..“ eða ,,Eitt stutt….“ og segja síðan frá.

Í samskiptum við þennan yfirmann skiptir líka miklu máli að þú sýnir sjálfstraust. Hafir skoðanir og sért markviss í tali. Til dæmis með því að orða hlutina eins og ,,mér finnst, ég tel, mín skoðun er, ég met það svo….“ og svo framvegis.

2. Klappstýran (e. The Cheerleader)

Þú skalt ekki fara í neitt uppnám þótt þessi yfirmaður afboði allt í einu fund með þér á síðustu stundu. Því það er ekta klappstýru-stjórnandi. Eina sem þú þarft að passa þig á er að taka þá strax af skarið og leggja til nýjan tíma. Því annars er hætta á að yfirmaðurinn einfaldlega gleymi því að tala við þig eða því verkefni sem þú vildir fá að ræða. Góð leið er samt að orða hlutina þannig að þeir muni ekki taka langan tíma, en þurfi að ræðast sem fyrst.

Talandi um þetta, er líka ágætt að hafa í huga að klappstýrutýpan er nokkuð gjörn á að breyta dagskránni og forgangsröðun. Jafnvel að kasta fram nýjum hugmyndum. En enginn okkar getur endalaust á okkur bætt þannig að stundum þarf að svara þessum stjórnanda með því að segja eitthvað eins og ,,já það væri gaman að hafa tíma í þetta en við þurfum auðvitað að klára það sem við erum að gera fyrst….“ Eitthvað sem bendir yfirmanninum á að nú þegar séu önnur verkefni sem þurfi að skilast.

Vertu líka ekkert að svekkja þig á því ef þér finnst yfirmaðurinn sjaldan eða aldrei gefa þér skýra endurgjöf eða leiðbeiningar. Þetta er einfaldlega týpan sem er mikið að peppa hópinn upp sem liðsheild en minna að spá í hvern og einn. Ef þig langar hins vegar að fá aðeins betri leiðbeiningar eða endurgjöf, skaltu taka af skarið sjálf/ur og spyrja spurninga eins og: Já hvaða verkefni fannst þér heppnast best? Eða hvers vegna fannst þér þetta best?“

3. Umönnunaraðilinn (e. The Caretaker)

Láttu það ekkert fara í taugarnar á þér þótt þessi týpa sé oft að tékka á þér. Sumir upplifa þetta sem yfirmann sem er ekki alveg að treysta fólkinu sínu fyrir sínum verkefnum þegar hið rétta er að viðkomandi er einfaldlega að athuga hvort það sé ekki örugglega í lagi. Það sem er aftur á móti fínt að gera er að svara þá líka þannig að hjá þér sé allt í góðu lagi. Og vera bara skýr. Til dæmis með því að segja: Jú, gengur bara mjög vel. Læt vita ef mig vantar hjálp.

Þessi týpa á það til að taka verkefni frá starfsfólkinu sínu og leysa úr málum sjálfur. Til að koma í veg fyrir þetta er fínt að þjálfa sig bara í viðbrögðum, sem þó eru kurteis. Til dæmis með því að segja: En hvernig hljómar að ég haldi aðeins áfram með þetta og við sjáum hvert það leiðir en læt annars vita?

Ekki taka því neitt illa heldur þótt þessi yfirmaður eigi það til að gefa þér ekki upplýsingar fyrr en á elleftu stundu. Þetta er bara týpan og snýst ekkert um þig. En þar sem þessi týpa er svo gjörn á að halda að sér upplýsingum er ágætt að vera svolítið markviss í að spyrja spurninga sjálf. Til dæmis: Áður en ég fer í þetta, er eitthvað sem þér finnst að ég ætti að vita….?

4. Regluvörðurinn (The Controller)

Mundu að þetta er íhaldssama týpan þannig að alls ekki taka því persónulega þótt yfirmaðurinn hafni einhverjum hugmyndum frá þér án þess einu sinni að skoða málin eða kynna sér þau til hlítar. Mögulega þarftu líka að huga að því hvernig þú berð upp tillögur um breytingar. Ein leið er til dæmis að orða hlutina þannig að breytingin hljómi ekkert endilega svo svakaleg. Til dæmis með því að segja: Spurning um að halda áfram að gera þetta eins og við erum vön en bæta um betur með því að gera þetta svona líka….?

Mundu síðan að þótt þér finnist oft eins og yfirmaðurinn treysti þér ekki, þá er það ekkert endilega svo. Þessi týpa yfirmanna einfaldlega lítur á hluta af sínu starfi sem ákveðið eftirlitshlutverk. Gott er að vinna með þessum eiginleika með því að spyrja spurninga í upphafi verkefnis. Til dæmis með því að spyrja: Hvernig sérð þú fyrir þér að góð niðurstaða/lending/útkoma væri?

Ekkert okkar er sérfræðingur í öllu en regluvörðurinn á það til að vænta þess af sínu starfsfólki þó, oft með því að dæla á starfsfólk alls konar upplýsingum. Ef svo er raunin, er ágætt að kasta boltanum kurteisislega til baka og spyrja spurninga eins og: Hvað í þessu finnst þér standa upp úr sem aðalatriðið?