Sitja sem fastast og hleypa gröfum og vöru­bílum ekki fram hjá

Egill Örn Bjarnason, gjaldkeri Brimbrettafélags Íslands, segir í samtali við fréttastofu að félagið hafi í dag kært niðurstöðu Skipulagsstofnunar um mat á umhverfisáhrifum framkvæmdanna. Félagið telji sig ekki hafa fengið réttláta málsmeðferð. Stofnunin hafi meðal annars vísað til þess í niðurstöðu sinni að fáir stunduðu brimbretti á Íslandi. 

„Fyrir utan það er til skýrsla sem landfyllingin er byggð á, sem unnin er af verkfræðistofu. Við erum búin að sýna fram á að sú skýrsla sé einfaldlega röng. Við fengum dönsku verkfræðistofuna DHI til þess að vinna gögn sanna það,“ segir Egill.

Félagsmenn hafa um árabil haldið því fram að framkvæmdir sem þessar myndu spilla öldugangi á svæðinu, og aftra því að brimbrettafólk gæti þar stundað sína íþrótt.

Verktakar vinna sér í haginn

Nú séu um tíu manns á vegum Brimbrettafélagsins við hafnarsvæðið til að tryggja að verktakar á vegum sveitarfélagsins geti ekki byrjað á landfyllingunni, syðst á nýjum hafnargarði Þorlákshafnar.

„Við erum bara fyrir þeim. Þeir ætla ekkert að moka yfir okkur. Verktakinn hefur bara sýnt þessu skilning og er ekkert að gera neitt ólöglegt.“

Fólkið sitji og standi á rampi sem hafi verið útbúinn svo aka megi gröfum og vörubílum með efni til að setja í sjóinn. 

„Við sitjum hér í stólum og stöndum til skiptis á þessum rampi. Þeir eru samt sem áður að vinna alla undirbúningsvinnuna, eru að keyra efni hingað á norðurhluta varnargarðsins, og vinna sér í haginn.“

Vilja að allir gangi sáttir frá borði

Samhliða kærunni sem félagið lagði fram hafi verið óskað eftir stöðvun verksins. Fulltrúar félagsins voni að úrskurðanefnd umhverfis- og auðlindamála bregðist hratt við og taki kæruna til greina. 

„Við vonum að það sé hægt að leysa þetta á þann hátt að allir geti gengið sáttir frá borði, en það virðist ekki eiga að hlusta á sjónarmið okkar,“ segir Egill.

Margs konar skýringar verið gefnar

Egill segir að á fyrri stigum málsins hafi náðst samkomulag við sveitastjórn um að höfnin yrði ekki stækkuð inn á svæðið sem brimbrettafólk vill vernda. 

„Nýverið var því breytt aftur og við höfum verið í baráttu á skipulagsstigum, gert þetta faglega og löglega. Bæði höfum við verið með athugasemdir við deiliskipulag og breytt aðalskipulag sem lagt hefur verið fram. Það hefur ekki verið hlustað á það. Ekki frekar en Vegagerðina, sem kom með neikvæða athugasemd, eða Umhverfisstofnun. Það hafa verið neikvæðar athugasemdir frá fleirum en okkur í skipulagsferlinu. Það virðist vera mjög einbeittur vilji hjá sveitastjórn að koma þessari óútskýrðu landfyllingu á staðinn.“

Með óútskýrðri landfyllingu á Egill við að ekki hafi fengist upplýsingar um til hvers sé verið að ráðast í framkvæmdina. 

„Ég er ekki viss um að íbúar í Þorlákshöfn átti sig á því hvað er verið að setja í garðinn hjá þeim. [Sveitarstjórnin] segir að þessi landfylling eigi að vera undir gáma. Það hafa komið alls konar útskýringar frá þeim. Fyrst átti að tengja þetta við Heidelberg, síðan Cargow ThorShip. Eftir samtal okkar við Thorship þá kannast þeir ekkert við það að þetta sé fyrir þá. Þetta virðist vera bara algjörlega á borði sveitarstjóra.“