Þunn­skipuð og ís­köld fram­lína ekki endi­lega stærsta vanda­mál Amorim

Nú þegar félagaskiptaglugganum er lokað er ljóst hvaða leikmenn Amorim hefur úr að velja til að reyna bjarga því sem bjargað verður á annars ömurlegu tímabili Rauðu djöflanna.

Hinn tvítugi Patrick Dorgu kom frá Lecce á Ítalíu og á að leys aðra vængbakvarðarstöðuna í leikkerfi Amorim. Ayden Heaven kom einnig frá Arsenal en hann er aðeins 18 ára gamall og mun eflaust ekki spila mikið þó varnarmenn Man United eigi erfitt með að haldast heilir.

Stóra fréttin var svo að Marcus Rashford hafi farið til Aston Villa á láni. Amorim hafði gefið út að Rashford myndi ekki spila nema leikmaðurinn myndi taka sig saman í andlitinu. 

Þar sem það gekk ekki eftir var Rashford lánaður út þó svo að framherjar liðsins séu hreinlega ískaldir fyrir framan markið og virðast vart geta keypt sér mark þessa dagana.

Svo slakir hafa þeir Rasmus Höjlund og Joshua Zirkzee verið að Kobbie Mainoo var látinn spila sem „fremsti“ maður í 2-0 tapinu gegn Crystal Palace á heimavelli. Minnti það á þegar forveri Amorim, Erik ten Hag, spilaði Christian Eriksen sem fremsta manni stuttu eftir komu sina til félagsins.

Hinn 22 ára gamli Höjlund hefur skorað aðeins tvö mörk í 19 deildarleikjum og hinn 23 ára Zirkzee aðeins einu marki meira í 24 deildarleikjum. 

Búist var við að Man United myndi reyna sækja framherja – eða allavega sóknarþenkjandi leikmann – til að fjölga möguleikunum í fremstu línu. Allt kom þó fyrir ekki þó svo að liðið hafi misst tvo sóknarþenkjandi menn þar sem Antony var lánaður til Real Betis. Þá var Tyrell Malacia lánaður til PSV í heimalandinu. 

Þó hann hafi ekki verið í stóru hlutverki þá losaði Man United þrjá leikmenn í glugganum og fékk aðeins inn einn sem er líklegur til að spila það sem eftir lifir leiktíðar. 

Það þýðir að það sem eftir lifir tímabils er tvíeykið hér að ofan líklegt til að deila með sér mínútunum í framherjastöðunni. Amorim spilar með einn framherja en tvo menn þar fyrir aftan.

Ekki verður sagt að Amorim hafi úr mörgum mönnum að velja í þær stöður. Hann hefur notað Bruno Fernandes þar sem og aftar á vellinum en liðið spilar einnig með tvo „djúpa“ miðjumenn í 3-4-2-1 leikkerfinu hans Amorim.

Áðurnefndur Mainoo spilar vanalega aftarlega á vellinum en var færður ofar á miðjuna gegn FCSB í Evrópudeildinni þar sem hann skoraði og lagði upp. Hann spilaði svo sem fremsti maður gegn Palace en eftir þá frammistöðu verður að teljast ólíklegt að Amorim prófi það aftur.

Þá virðist Amorim vilja hafa annað hvort Bruno eða Kobbie við hlið Manuel Ugarte sem leikur eingöngu í einni af aftari miðjumannsstöðunum. Það þýðir að aðeins annar af Bruno eða Kobbie geti leikið framar á vellinum.  

Þeir Amad og Alejandro Garnacho deilt með sér mínútum fyrir aftan framherjann. Jafnframt hafa báðir verið prófaðir sem vængbakverðir í kerfi Amorim. Sá fyrrnefndi hefur að öðrum ólöstuðum verið besti maður Man United síðan Portúgalinn tók við sem þjálfari liðsins. Á meðan vængmaðurinn Garnacho hefur átt erfitt með að finna sína stöðu í leikkerfinu.

Að koma boltanum í netið hefur verið eitt helsta vandamál Man United á leiktíðinni en liðið hefur aðeins skorað 28 mörk í 24 leikjum í ensku úrvalsdeildinni. Liðið skoraði vissulega 16 mörk í Evrópudeildinni en þar af komu sex í aðeins tveimur leikjum, þrjú gegn Bodø/Glimt og þrjú gegn Porto.

Miðvörðurinn Lisandro Martínez hafði óvænt stigið upp sem helsti markaskorari liðsins ásamt því að leggja upp sigurmarkið þegar Rangers mætti á Old Trafford í Evrópudeildinni. 

Ofan á þá tölfræði má segja að Martínez sé best spilandi miðvörður liðsins og gríðarlega mikilvægur punktur í uppspili þess ásamt því að leggja línurnar þegar kemur að því að spila vörn. Hann mun hins vegar ekki spila meira á þessari leiktíð þar sem hann sleit krossband í hné í tapinu gegn Palace.

Það verður ekki annað sagt en Amorim eigi erfitt verkefni fyrir höndum þó svo að honum hafi loks tekið að losa sig við Rashford. Þjálfarinn þarf nú að einbeita sér að því að hita upp ískalda framherja liðsins og finna lausn á uppspilsvandræðum liðsins en undanfarið hefur markvörðurinn André Onana þrumað fram í hvert skipti sem hann fær boltann. Og það með litlum árangri enda framherjar Man Utd ekki beint frábærir í loftinu.

Meira en áratugur er síðan David Moyes, þáverandi þjálfari, sagði að Man United þyrfti að bæta sig á mörgum sviðum. Þar á meðal í sendingum, þegar kæmi að því að skapa færi og þegar kæmi að varnarleik. Enn þann dag í dag á það vel við.

Næsti leikur liðsins er gegn Leicester City – liði Ruud van Nistelrooy en hann var aðstoðarþjálfari Ten Hag og stýrði liðinu áður en Amorim tók við – í ensku bikarkeppninni. Leikurinn verður sýndur beint á Vodafone Sport.