Hollendingurinn Cody Gakpo er kominn með átta mörk í ensku úrvalsdeildinni í fótbolta, og þar af sjö á síðustu tveimur mánuðum, eftir að hafa skorað tvennu í 4-1 sigri gegn nýliðum Ipswich á Anfield í dag.
Liverpool átti ekki í neinum vandræðum með að leggja Ipswich að velli, sérstaklega eftir að Dominik Szoboszlai kom liðinu yfir eftir tíu mínútna leik, með skoti af vítateigslínunni.
Mohamed Salah bætti svo við marki á 35. mínútu úr þröngu færi, eftir fyrirgjöf frá Gakpo.
Gakpo skoraði sjálfur skömmu fyrir hálfleik, þegar hann fylgdi á eftir skoti Szoboszlai eftir frábæra sendingu Ryan Gravenberch.
Seinna mark Gakpo kom svo um miðjan seinni hálfleik eftir fyrirgjöf frá Trent Alexander-Arnold. Gestirnir rétt náðu að minnka muninn í lokin, með marki Jacob Greaves eftir hornspyrnu nýja mannsins Julio Enciso sem var að koma frá Brighton.
Liverpool er nú með 53 stig á toppi úrvalsdeildarinnar, sex stigum á undan Arsenal sem marði sigur á Úlfunum, 1-0.
