„Per­sónan Elmar er alls ekki Helgi“

„Þetta er skálduð persóna. Eins og fram kemur í byrjun hvers þáttar eru sumar persónur skáldaðar í dramatískum tilgangi. Hér er ekki um heimildarþætti að ræða,“ segir Rakel í samtali við Vísi.

Hallgrímur Helgi Helgason, þýðandi og handritshöfundur, telur einsýnt að persónan sem Gísli Örn Garðarsson leikur og heitir Elmar, eigi að tákna föður sinn Helga Skúlason. En þetta er í þáttunum um Vigdísi Finnbogadóttur fyrrverandi forseta íslenska lýðveldisins. Rakel segir þetta mikinn misskilning.

„Persónan Elmar er skálduð og á að tákna mótstöðu þeirra sem töldu Vigdísi ekki hafa þá reynslu sem þurfti til að taka að sér starf leikhússtjóra.“

Rakel segir að Vesturport, og aðstandendur þáttanna, hafi aldrei skoðað Helga sérstaklega þegar Elmar var teiknuð upp. Þessi túlkun Hallgríms sé því úr vegi. Heldur hafi margar persónur verið teknar og þær steyptar í eina. Eins og tíðkast þegar dramatísk framvinda er annars vegar.

„Enn þann dag í dag eru skiptar skoðanir um fólk í stjórnunarstöðum og það var nú heldur betur í tíð Vigdísar,“ segir Rakel.

Eins og áður sagði hafa þættirnir verið lofaðir í hástert en síðasti þátturinn, sá fjórði, verður sýndur á sunnudagskvöldið. Rakel segir að Vigdís Finnbogadóttir hafi verið þekkt fyrir það í sinni forsetatíð sameina þjóðina. Og svo mögnuð sé hún að enn nái hún að sameina heilu fjölskyldurnar fyrir framan sjónvarpstækin.

„Það er einstaklega ánægjulegt,“ segir Rakel.