Conte vill fá Garnacho í staðinn fyrir Kvaratskhelia

Um helgina greindi Conte frá því að Kvaratskhelia hefði óskað eftir því að fara frá Napoli í þessum mánuði. Líklegast þykir að Georgíumaðurinn fari til Paris Saint-Germain.

Samkvæmt ítölskum fjölmiðlum er Conte þegar byrjaður að undirbúa brotthvarf Kvaratskhelias og vill fá Garnacho til að fylla skarðið sem hann skilur eftir sig.

Garncho var í byrjunarliði United í leiknum gegn Arsenal í bikarkeppninni í gær en hafði þar áður verið á bekknum í fimm leiki í röð.

Kvaratskhelia sló í gegn með Napoli tímabilið 2022-23 þegar liðið varð ítalskur meistari með yfirburðum. Illa gekk á síðasta tímabili en Napoli hefur náð vopnum sínum á ný eftir að Conte tók við liðinu.

Napoli er með fjögurra stiga forskot á toppi ítölsku úrvalsdeildarinnar en liðin í næstu tveimur sætum, Inter og Atalanta, eiga leiki til góða. Kvaratskhelia hefur skorað fimm mörk og lagt upp þrjú í sautján deildarleikjum í vetur.