Hús­félag sektaði í­búa um 10 þúsund vegna of lé­legra sam­eignarþrifa

Í áliti nefndarinnar, sem birt var á dögunum, segir að íbúi í fjölbýlishúsi hafi leitað álits á því að viðurkennt yrði að húsfélaginu hafi verið óheilimt að gera kröfu um 10 þúsund króna gjald vegna þrifa á sameign sem formaður húsfélagsins hafi metið ófullnægjandi.

Íbúinn vildi meina að þegar hann hafi ráðist í sameignarþrifin, sem hann hlaut sekt fyrir, hafi stigagangurinn verið þrifinn, sandi og laufblöðum verið sópað burt og gömlum blöðum verið hent en önnur  vissulega skilin eftir. Ruslageymslan hafi einnig verið þrifin þrátt fyrir að gjaldkeri húsfélagsins haldi öðru fram.

Sömuleiðis vildi íbúinn meina að fundarboð á húsfundinn þar sem ákvörðun hafi verið tekin um sektina hafi verði ólögmætt, enda hafi ártal ekki tilgreint og hvergi fjallað um téðar sektir vegna þrifa. Þá hafi fundargerðin verið haldin göllum og þar væri meðal annars ekki tilgreint um hvaða húsfélag væri að ræða, hver hafi verið fundarritari og fundarstjóri og hvað þá upplýsingar um atkvæðagreiðslur.

Matskenndar sektir og óánægja með myndavél

Í áliti nefndarinnar kemur fram að íbúinn vilji meina að skýrt hafi komið fram í öllum samskiptum að íbúar skipti með sér þrifum á sameign og sinni því en að gjaldkeri og formaður húsfélagsins hafi metið það sem svo að það hafi ekki verið nægilega vel gert. Sektaálagningin hafi verið matskennd en hvergi væri að finna upplýsingar um það hver ætti að taka þrifin út og í hvaða tilfellum heimilt væri að sekta vegna lélegra þrifa.

Íbúinn var ennfremur óánægður með að gjaldkeri húsfélagsins væri með myndavél á stigaganginum tengda við símann sinn þannig að hún geti fylgst með því hverjir þrífi og hverjir ekki.

„Hún hafi fylgst með því hvaða fólk fari um stigaganginn og hve lengi viðkomandi sé að þrífa. Þeir sem gangi um sameignina séu þannig í mynd án þess að neinn fyrirvari eða skilti láti vita af því. Þetta sé óheimilt að grundvelli persónuverndarlaga og friðhelgi einkalífs,“ kom fram í málflutningi íbúans.

Matarafgangar út um allt og pítsukassar í hjólageymslu

Í andsvörum fulltrúa húsfélagsins kom fram að þrifum á sameign hafi verið ábótavant og þau dregist hjá umræddum íbúa. Eingöngu hafi verið ryksugað og skúrað, ruslageymslan hafi ekki verið þrifin „þar sem matarafgangar hafi verið um allt, pizzakassi í hjólageymslu og blöð í kassa sem hafi átt að tæma. Laufblöðum hafi aðeins verið sópað frá en þau ekki verið fjarlægð þannig að þau hafi fokið aftur inn“.

Fram kemur að þetta hafi ekki verið í eina skiptið en íbúinn hafi viðurkennt að hafa gleymt að ryksuga á miðvikudögum. „Maður álitsbeiðanda [íbúans] hafi verið spurður hvort þau hygðust ekki ætla að ljúka þrifunum en hann sagt að þeim hafi verið lokið. Því hafi þurft að beita sektinni.

Vegna myndavélarinnar þá hafi uppsetning hennar verið samþykkt af meirihluta eigenda vegna þjófnaðar úr geymslum, skemmda og þjófnaðar á hjólum. Ekki sé verið að nota myndavélarnar til að njósna um neinn,“ segir í álitinu.

Féllst á kröfu íbúans

Fulltrúar kærunefndarinnar bentu á að á grundvelli laga um fjöleignarhús sé eigendum unnt að taka sameiginlegar ákvarðanir um það hvernig skuli staðið að innheimtu fjármuna til húsfélagsins í þeim tilgangi að það geti sinnt hlutverki sínu.

Kærunefnd getur ekki fallist á að lögin veiti húsfélögum heimild til að innheimta gjöld af einstaka eigendum á þeirri forsendu að þeir sinni ekki þrifum á sameign eða að þrifum sé ekki sinnt með fullnægjandi hætti. Því ákvað nefndin að fallist á kröfu íbúans að óheimilt væri að gera kröfu um 10 þúsund króna gjald vegna þrifa á sameign sem formaður húsfélagsins meti ófullnægjandi.

Hafði þegar leitað til Persónuverndar

Í málinu leitaði íbúinn sömuleiðis álits nefndarinnar vegna uppsetningar húsfélagsins á myndavélinni sem var til umræðu og þess krafist að myndavélin yrði tekin niður. 

Kærunefndin gat ekki fallist á þær kröfur þar sem samþykki meirihluti eigenda fyrir vélinni lá fyrir og íbúinn hafði þegar leitað til Persónuverndar vegna ágreinings um notkun myndavélarinnar og kæmi það álitaefni ekki til úrlausnar af hálfu nefndarinnar.