Risa­stór á­kvörðun í­búa í Þor­láks­höfn handan við hornið

Íbúakosningunni var frestað á síðustu stundu í maí eftir athugasemdir landeldisfyrirtækisins First Water í grenndinni. Íbúar áttu að greiða atkvæði um deiliskipulag fyrir mölunarverksmiðju og höfn þýska fyrirtækisins Heidelberg í Keflavík við Þórshöfn í Ölfusi. Á aukafundi bæjarstjórnar var ákveðið að fresta atkvæðagreiðslunni, sem gerist afar sjaldan.

Ákvörðunin var tekin eftir að bæjarstjórn barst fréf frá forstjóra landeldisfyrirtækisins First Water sem er með starfsstöðvar nálægt fyrirhugaðri mölunarverksmiðju. Í bréfinu lýsti forstjórinn áhyggjum af því að verksmiðjan væri svo nálægt eldisstöðvunum og algjörri andstöðu við byggingu mölunarverksmiðjunnar.

Elliði Vignisson bæjarstjóri sagði ekki annað verið hægt að gera en að fresta atkvæðagreiðslunni. Hann sagði nauðsynlegt að eiga samtal við First Water sem hyggur á framkvæmd fyrir rúmlega hundrað milljarða króna á næstu sex árum. First Water segir um að ræða stærstu einkaframkvæmd sögunnar á Íslandi.

„Tekjur sveitarfélagsins gætu numið 700 miljónum á ári og það verða til sextíu til áttatíu störf sem greiða um eða yfir milljón á mánuði. Um leið eru þetta umhverfisáhrif, þetta er verksmiðja sem fer ekki framhjá neinum sem keyrir framhjá. Þannig það er mjög eðlilegt að um málið séu skiptar skoðanir,“ sagði Elliði.

Fram kemur á vef Ölfus að verkfræðistofan Cowi hafi tekið að sér að rannsaka og leggja fram gögn er varðar þann varhug sem FirstWater galt varðandi ryk, hávaða og titring frá mölunarverksmiðju í Keflavík. Þeirri vinnu hafi miðað vel áfram. Verkfræðistofna Efla hafi verið fengin til að yfirfara gögnin og leggja mat á fagleg gæði þeirra.

„Enn fremur að Efla leggi sérstakt mat á hvort að niðurstöður þessara rannsókna kalli á að Sveitarfélagið Ölfus óski eftir því að Skipulagsstofnun opni umhverfismat að nýju. Fulltrúar Eflu telja einsýnt að þeim takist að ljúka sinni vinnu þannig að gögn liggi fyrir vel áður en til íbúakosninga kemur í samræmi við lög þar að lútandi.“

Þá liggi fyrir að Det Norske Veritas hafi í nokkurn tíma unnið að hættumati fyrir Þorlákshöfn og vænta hafnar í Keflavík. Stefnt sé að því að gögn þar að lútandi liggi fyrir eigi síðar en 4. nóv. og geti því farið í kynningu samhliða gögnum frá Eflu.

Bæjarstjórn Ölfuss leggur því til að boðað verði að nýju til bindandi íbúakosningar vegna mölunarverksmiðjunnar og hafnarinnar í Keflavík við Þorlákshöfn.

Íbúum mun því gefast kostur á að kjósa um tillögurnar og verða svarmöguleikar eftirfarandi:

• Já (ég samþykki skipulagstillögurnar og þar með að fyrirtækið fái heimild til að reisa verksmiðjuna sem fjallað er um í áður auglýstum skipulagstillögum).

eða

• Nei (ég hafna skipulagstillögunum og þar með að fyrirtækinu verði ekki heimilað að reisa verksmiðjuna sem fjallað er um í áður auglýstum skipulagstillögum).