Hvað gerist þegar Laddi hittir Ei­rík Fjalar, Skrám og Elsu Lund?

Þetta segja þau Ólafur Egill Egilsson og Vala Kristín Eiríksdóttir höfundar nýrrar stórsýningar Borgarleikhússins, Þetta er Laddi. Um er að ræða fyrsta viðtalið við teymið um innblásturinn, sköpunarferlið og aðkomu Ladda að sýningunni sem og áhrif hans á íslenskan húmor en tilkynnt var í ágúst síðastliðnum að sýningin væri í bígerð.

„Leikhús með stóru L-i“

Í aðalhlutverkum verða Laddi og fremstu gamanleikarar Borgarleikhússins. Leikstjóri er Ólafur Egill en hann skrifaði og leikstýrði metsölusýningunni Níu líf um ævi Bubba Morthens auk þess sem hann er annar af höfundum söngleiksins Elly.

„Þetta er leikhús með stóru L-i,“ segir Ólafur Egill og bætir við að öll meðöl leikhússins verði notuð til að gera gríni og tónlist Ladda skil með þeim hætti sem fólk hefur ekki séð áður. Vala Kristín tekur undir það og bætir við að sýningin verði í takt við það sem Laddi hefur verið fyrir íslensku þjóðina. „Hann er eins og flugeldasýning!“

Helstu hlutverk verða í höndum Ásthildar Úu Sigurðardóttur, Birnu Pétursdóttur, Halldórs Gylfasonar, Hákons Jóhannessonar, Kötlu Margrétar Þorgeirsdóttur, Völu Kristínar og Vilhelms Netó. „Það er eiginlega þjóðarsport að herma eftir karakterunum hans Ladda,“ segir Ólafur Egill „og nú fáum við að sjá landsins bestu leikara spreyta sig á því.“

Einnig mun stíga á stokk hljómsveit undir stjórn Jóns Ólafssonar og ekki má gleyma Ladda sjálfum sem fær nú í fyrsta sinn tækifæri til að hitta þær fjölmörgu persónur sem hann hefur skapað í gegnum áratugina og eru þjóðinni svo kærar.

Handritshöfundar hafa lagst í mikla heimildarvinnu og skrifað grunn að handriti sýningarinnar en jafnframt fengið Ladda sjálfan til að fylla í eyðurnar.

„Laddi er alveg æðrulaus fyrir þessu,“ segir Ólafur og þau Vala Kristín lýsa hversu fallegt það er að fá að segja sögu manns sem ólst upp við erfiðar aðstæður og sneri þeim upp í gull með gleðina og grínið að leiðarljósi.