Upp­gjörið: Valur - Porto 27-27 | Ó­trú­legir Vals­menn náðu að landa stigi

Valsmenn náðu ótrúlegu jafntefli gegn Porto í kvöld í annarri umferð Evrópudeildarinnar í handbolta eftir að hafa verið sjö mörkum undir í hálfleik. Lokatölur 27-27 þar sem Björgvin Páll Gústavsson var stórbrotinn í marki Vals.

Valsmenn og FH-ingar blésu til handboltaveislu í kvöld í Kaplakrika þar sem bæði lið léku í Evrópudeildinni í handbolta. Tvíhöfði af stærri gerðinni. Uppselt var í Kaplakrika og öllu til tjaldað á 95 ára afmælisdegi Hafnarfjarðarliðsins. Valsmenn riðu á vaðið og mættu Porto.

Hófst leikurinn á markvarðarsýningu þar sem markverðir beggja liða skiptust á að verja. Eftir aðeins þriggja mínútna leik fékk hægri skytta Porto, Mamadou Soumaré, beint rautt spjald fyrir að skjóta í höfuð Björgvins Páls úr vítakasti. Stór, en hárréttur dómur strax í upphafi leiks.

Fyrsta mark leiksins kom ekki fyrr en eftir um fjögurra mínútna leik og voru það Valsmenn sem skoruðu það. Valsmenn náðu þar með að vera einu skrefi á undan Porto fyrsta korter leiksins, en þá náðu Portúgalarnir að snúa leiknum sér í vil.

Valsmenn áttu engin svör á sterkum varnarleik andstæðinganna og ef þeir náðu skoti þá var Sebastian Abrahamsson, markvörður Porto, í miklum ham og varði hvað eina sem kom að marki hans.

Það var einmitt um þetta leyti sem Þorsteinn Leó Gunnarsson kom inn á völlinn og skoraði strax í sinni fyrstu sókn fyrir Porto, sem reyndist að lokum hans eina mark í leiknum þrátt fyrir fleiri tilraunir.

Valsmenn þurftu að bíða í um sjö mínútur eftir marki á þessum kafla og staðan orðin 6-10 eftir 22. mínútna leik.

Vandræðagangur Vals hélt áfram fram að hálfleik á meðan Porto jók forystu sína. Porto setti svo kirsuberið á kökuna í þessum fyrri hálfleik með sirkusmarki á lokasekúndu fyrri hálfleiksins. Staðan 9-16 í hálfleik og brekkan því brött fyrir heimamenn í þeim seinni.

Valsmenn mættu þó vel gíraðir inn í síðari hálfleikinn og þá sérstaklega markvörður liðsins, Björgvin Páll. Liðið náði strax 7-1 kafla og voru því aðeins einu marki frá því að jafna leikinn eftir aðeins 11 mínútur í síðari hálfleik.

Porto náði þó að halda Val frá sér í eins til tveggja marka fjarlægð næstu mínútur.

Á 45. mínútu fór rauða spjaldið aftur á loft þegar Leonel Fernandes braut á glórulausan hátt á Andra Finnssyni sem var kominn einn í gegn í hraðaupphlaupi. Ótrúlegt að láta sér það detta í hug að rífa aftan í mann í hraðaupphlaupi.

Á 53. mínútu náðu Valsarar að jafna loksins leikinn, 23-23, og allt í járnum í smekkfullum Kaplakrika.

Á lokamínútunum kom Björgvin Páll sínu liði í tvígang yfir með marki yfir allan völlinn og allt ætlaði um koll að keyra. Valsarar héldu að þeir væru að landa mögulega sigri þegar tæp ein og hálf mínúta var eftir og Andri Finnsson kom leiknum í tveggja marka mun, staðan 27-25. Porto tókst þó að jafna leikinn þegar aðeins tvær sekúndur voru eftir.

Valur tók þá leikhlé og settu upp í skot fyrir Agnar Smára Jónsson frá miðju. Það gekk þó ekki upp og lauk leiknum því með jafntefli eftir ótrúlega endurkomu Vals.

Atvik leiksins

Nóg af atvikum í þessum leik. Atvikið er þó þegar Björgvin Páll skoraði sitt þriðja mark í leiknum þegar tvær mínútur voru eftir af leiknum og liðið komið í forystu. Allt ætlaði um koll að keyra þega boltinn söng í netinu eftir að þrír leikmenn Porto höfðu kastað sér á eftir skoti Björgvins.

Stjörnur og skúrkar

Skærasta stjarnan var Björgvin Páll, en hann þrífst hvað best í svona leikjum. Þrjú mörk, tvær stoðsendingar og 19 varin skot hjá landsliðsmarkverðinum.

Viktor Sigurðsson stóð einnig upp úr hjá Val sóknarlega, en hann endaði markahæstur síns liðs með fimm mörk og stýrði sóknarleiknum ákaflega vel þegar Valsmenn snéru leiknum sér í vil.

Skúrkurinn er Leonel Fernandes sem fékk seinna rauða spjald leiksins fyrir glórulaust brot á Andra Finnssyni sem var sloppinn einn í gegn í hraðaupphlaupi. Í raun algjör skömm af þessu broti.

Dómarar

Eistneskt dómarapar dæmdi þennan leik, Marion Kull og Alvar Tint. allt upp á tíu hjá þeim. Bæði rauðu spjöld leiksins voru hárrétt og þeir misstu aldrei leikinn frá sér þrátt fyrir mikla spennu í leiknum

Stemning og umgjörð

Þú býrð ekki til betri umgjörð á Íslandi í kringum íþróttakappleik heldur en var boðið upp á hér í kvöld. Stútfullur Kaplakriki á 95 ára afmæli FH þar sem Hafnarfjarðarliðið og Valsarar sameinuðu krafta sína. Stemningin var því eftir því og þá sérstaklega í jafn spennandi leik og boðið var upp á á milli Vals og Porto. Það sat ekki kjaftur á rassinum síðustu fimm mínútur leiksins.